Kawlram Chung Party Thawng Bik AFPFL An Rak I Then Lio Kawlram Boruak

Anti-Fascist People's Freedom League(AFPFL) or Pha-sah-pah-lah hi Gen. Aung San telh in kawlram chung bochan deuh hruaitu hna nih Japan pawl thawl dingah 1944 ah an rak dirh. AFPFL hi kawlram chung tihzah deuh mi hruaitu nih an dirh mi a si caah Independence hlan 1945 in Party an ni then 1958 tiang hi kawlram chung a lar bikmi party a rak si. An mah peng nih cozah an rak ser. Tulio NLD nak in rak lar deuh dawh a si.

AFPFL An I Thennak Aruang: 1947 ah AFPFL chairman Aung San an rak thah caah U Nu cu an party chairman ah an thim than. Independence hnu in U Nu nih AFPFL chairman a tuan hlei ah Prime Minister zong a tuan chih. 1956-1957 kar kum khat lawng U Ba Swe Prime Minister a rak tuan ter.Ba Swe le Kyaw Nyein hi U Nu nih ai bochan bik mi an rak si, an mah nawl loin U Nu nih zeithil hmanh a rak tuah ngam lo an ti theu. Hiti Ba Swe le Kyaw Nyein nih Prime Minister U Nu cung nawl an ngei hi mizapi nih theih a si tikah U Nu a ai puang. Ba Swe le Kyaw Nyein telh loin a thil ti khawhnak langhter ai zuam, Ba Swe le Kyaw Nyein a hrial hna i Kyaw Nyein le Ba Swe an thin hung ve. 

U Nu le Kyaw Nyein kar i rem lo nak hi 1954 hrawng in ai thawk i U Nu kawlram Prime Minister sinak in thla 9 chung ai din kar(1956-1957) ah a rak zual chin. Hiti ai din kar ah AFPFL party hruaitu lutlai pawl meeting an rak tuah i U Nu hi prime minister si ti loin China ram CPC Chairman Mao Zedong bantuk in national figure ah chiah ding ah hnatlaknak an ngei. Hiti an biachah hi Thakin Tin nih Kyaw Nyien a rem lo ruangah U Nu cu 'Kyaw Nyien le Ba Swe nih prime minister na si ding an duh ti lo caah party chairman lawng tuan ter ding biachahnak an ngei cang' tiin U Nu a hlen i U Nu cu a thin phang i kumkhat chung prime minister sinak in i din ai timh mi cu kumkhat a tlin hlan ah Prime minister si nak Ba Swe a chuh than. Cu hnu cun U Nu le Thakin Tin an tangti i Kyaw Nyein le Ba Swe an tangti ve. Cuti cun, AFPFL hruaitu kar i rem lo nak a karh chin leng mang caah a donghnak ah cun i then ding tiang bia chah a si.

Nu-Tin Clean AFPFL Vs Swe-Nyein Stable AFPFL: AFPFL i cheu ding bia an chah hnu ah cozah ser an rak i cuh than. MPs tam deuh aa sawm kho mi nih cozah ser ding a rak si cang. MP pakhat te hmanh an rak biapi tuk. Ramchung um le ramdang khual tlawng MPs vialte an rak auh dih hna. Kap hnih lei nih party dang le tlangcung MPs hna cu 'Kan mah lei vote nan kan pek ah cun hihi kan in tuah piak lai' tiin bia an rak kamh hna. Mon le Rakhine MPs nih cun U Nu kha 'vote kan in pek lai i Statehood na kan pek ve lai' an ti i U Nu nih 'Yes' a ti ve. Kan mah Chin MPs pawl cu 'Rangon khuachung vanlawng in kan kulh pi uh' an ti hna tiin bia chawkvai ka rak theih bal,a hman hnga maw dik.

 Cuticun MPs pawl an rak i cuh hna i June 9, 1958 kawlram parliament ah vote thlak nak an rak tuah.U Nu hruaimi Clean AFPFL nih vote 8 in a rak tei. 

                                                                       Nu-Tin           Swe-Nyein
AFPFL members(Burma proper)           51                    97
National United Front(NUF)                  44                    1
ANUO(Arakanese)                                    6                      0
Shans                                                           16                     9
Kachins                                                       3                       4
Chins                                                           3                       3
Kayah                                                          2                       0
Karens                                                         2                       5
                                                                    --------             -------
                                                                     127                   119


U Nu nih vote 8 in a rak tei caah cozah a ser than. Nain, thil ti kho deuh le tihzah deuh mi hi AFPFL member deuh an si i AFPFL MPs tam deuh hi Swe-Nyein sin ah an um cang caah U Nu cu a duh poah in ai cawl kho ti lo. Kap hnih kar i rem lo nak a fak chin chin. 1958-1959 caah budget zong Swe-Nyein phu nih an fehter duh ti lo caah U Nu nih Gen. Ne Win kum hnih chung (1958-1960) uknak a rak lak ter beh nak kha a si. 


*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!