Thawngpang Bultan( March 7)

Boko Haram le IS Ralhrang An Tang Ti Cang Lai: 2009 thawk in Nigeria ram ah Islam ram ser ding aa timh mi Boko Haram nih Iraq le Syria ram ah Islam ram ser a timh ve mi IS ralhrang pawl he kan tangti cang lai tiin audio in an chim tiah BBC nih a thanh.

Boko Haram hi IS ralhrang lawng si loin al-Qaeda he zong pehtlaihnak an ngei. Mah ralhrang phu hi 2002 ah rak dirh a si i 2009 hnu ah sual hram an thawk, Nigeria ram thin phang in a chiah hna. 

Boko Haram nih Nigeria ram chung mi tam deuh nak hmun cheukhat ah bomb puah hnawh zong a hmang i minung tam pi an thah cang hna. Sianghngkachia nu 200 leng zong an tlaih hna. An mah ruangah hin Nigeria election zong tuan deuh tuah ding a si nain March 28 ah thial than a si. 

Hliam A Tong Mi US Ambassador Pa Uico Sa An Pek: Kan hnu March 5 ah South Korea khualipi Seoul ah hliam a tong mi US ambassador cu sizung a um chungah South Korea upa pakhat nih siaherh ngai in uico sa le tihang a chanh tiah Dailynews nih a tial.

Uico sa le tihang hi South Korea mipi ruahnak ah cun hma a dam ter ti a si. Nain, a rak chanhmi uico sa hi Mr. Lippert sin a phak hlan ah sizung nawl ngei tu nih an khirh than ti a si. Nitlak lei ram ah cun uico sa ei hi minung sa ei bantuk in ruah a si. 

HBA Triennial General Meeting ah Hruaitu Thar An Thim Hna: A voi 19nk Triennial Meeting le Pengpumh, February 28, Bethel Baptist Church, Hakha ah tuah a si i (2015-2018) HBA hruaitu thar cu a tanglei bantuk in a thim hna:

President Rev. Paul Tum Ceu (HBC)

Vice President Rev. Thawng Lian Thang (IBC)

General Secretary Rev. Joel Nawl Cung Lian (Zion). The Hakha Post 

Putin Dohtu Nemtsov Thahnak He Pehtlai In Minung 2 An Tlaih Cang Hna: Kan hnu Feb 27 ah Russia President Putin dohtu Nemtsov an thahnak ah a cawlcang mi tiin an puhmi hna minung 2 cu Russia humhimnak lei tuanvo ngei tu Federal Security Service nih an tlaih cang hna tiah BBC nih a thanh. 

Mr. Nemtsov hi President Putin he an ruahnak ai kalh ngai, Ukraine kong zongah Putin a dirhmun a doh ngai tu a si. Hiti Putin a doh leng mang caah 'Putin nih a ka thah men lai' tiin a thih hlan interview an rak tuah nak ah a chim cang. A tu an thah mi zong hi Putin nih a thahter mi a si lai tiin mi tampi nih zumh a si.

*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!