Thawngpang Bultan (March 8)

CCC nih A Donghnak Degree Peknak An Tuah Cang: Bible lei lawng si loin vawlei lei fimthiamnak zong Chin mino a ronh tu Chin Christian College nih a donghnak degree pek nak cu tuni March 8, Hakha HBA ah an tuah i minung 68 nih degree an lak. 

Tukum hi CCC min in degree pek nak a dongh kum a si lai, 2015-2016 cacawn kum ah cun College timi kha University ah an thlen cang lai. CCC hi 1990 ah rak dirh a si i tutiang ah hin sianghngakchia 1021 leng degree a pek cang hna. CCC ah hin B.Th., BRE le M.Dev. hna cawn khawh a si hlei ah BA in English le Business Administration zong cawn khawh a si. Hakha Reporter

Hakha Um Tikhor An Reu Dih: Thal kan hung panh deuh bang in Hakha um tikhor tam pi cu an reu dih i mi cheu cu zing zan in ti an hngah. Hiti zing zan an hngah ko bu hmanh in gallon 5 tlum ti pumthum lawng hna an ngah kho ti a si.

A ti kho deuh le a rum deuh nih cun mawtaw in ti an cawk i mawtaw pakhat ah Ks 40,000-50,000 kar pek a si. Mi zaran nih cun hi bantuk mawtaw in zuar mi ti cu cawk a har ngai caah an duh zong duh lo zongah tikhor ti lawng hngah a si. Tuhi timit ti lak an timh lio a si i zeitikdah an ngah kho te lai ti bel cu a fiang rih lo. Hakha Reporter 

Kachin Ram Phakant ah Leivawr Minnak in Minung 8 An Thi: March 6 ah khan Kachin ram Phakant ah lung man sung an kawl nak leivawr a min i minung 8 leng an thi tiah BBC nih a thanh. 

RFA nih cun minung 50 leng an tlau a ti nain palik nawl ngei tu nih BBC ah an chimnak ah cun minung 8 lawng an thi an ti. Tuhi a tlaumi zong cozah lei le tuanvo ngeitu company lei nih an kawl cuahmah hna. 

Israel Mipi 80,000 Lengnih Netanyahu A Rian Chiah Seh Tiin An Au Hnawh: Nizaan March 7 ah khan Israel ram Robin Square ah minung 80,000 leng an ni pum i tuthla election tuah tikah Benjamin Netanyahu cu Israel Prime Minister si ding ai tlak ti lo, midang nih an chon awk a si cang tiin an au hnawh tiah The Guardian nih a tial. 

Hi mibu sin bia a chim tu Meir Dagan nih 'Israel chan chung ah a chia bikmi hruainak kan phan' tiin Netanyahu a mawtchiat. Israel ram chung election hi March 17 ah tuah ding a si. 

2014 Chung Vawleicung Ram Rum Pawl An GDP A Karh Ning: Tutiang ah vawleicung economy ngan bik hi USA a si i a changtu ah China a si. Pathumnak hi Japan a si ve. US GDP hi 2013 nak in 2014 ah 2.4% a ngan deuh, China GDP zong hi 7.4% in a ngan deuh ve. Japan GDP zong 2014 chungah 2.2% in a ngan deuh ve. China a thancho ning cu kum dang nak in a nuar deuh ngai nain US le Japan hmai ah cun a rang tuk rih thiam thiam. 

GDP(Gross Domestic Product) timi cu kumkhat chung ah ram pakhat chung thil chuak mi vialte a man fonhmi zat kha a si. 

*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!