Thawnpang Bultan (March 4)

US Cozah Nih Rawiphiartu Ah A Ruahmi Snowden US Kir A Duh: US nih vawlei pi a thli tein a ngiat peng ko timi a phuangtu Edward Snowden cu Russia ah kum 2 ai dor hnu ah US lei kir a duh cang tiah a sihni pa nih nizaan March 3 ah khan a chim tiah Daily Mail nih a tial. 

Snowden hi US ram humhimnak lei tuanvo ngei tu Centre Intelligence Agency(CIA), Defence Intelligence Agency (DIA), National Security Agency(NSA) le Booz Allen Hamilton tibantuk caah rian a rak tuan bal mi a si i US nih internet le social media hmang in vawleipi an um kal ning vialte a ngiat(spy) peng nak cu 2013 ah khan a rak phuan caah US ah um ngam ti loin Russia ah dornak a kawl hi a si.

Anih hi US cozah nih rawiphiartu tiin a ruah nain mipi cheukhat nih cun pa raltha tak ah an ruah. Abik in EU ram mi hna nih cun an thangthat ngai. Nikum Nobel Peace Price ca zongah an rak chuahpi (nominate) i The Guardian poll ah top 1 a rak ngah nain laksawng petu hi US minung an tam ve caah a rak ngah lo, hiti Snowden Noble Peace Prize an rak pek lo ruangah laksawng petu committee zong an rak soisel ngai hna. 

China Nih Ralkap Budget 10% Bak Kai Ter Ai Timh: Vawleicung ke ralkap tam bik a ngei tu China cu tukum 2015 a ralkap caah a hman ding budget cu nikum nak in 10% a kai ter lai tiah BBC nih a thanh. 

Hi budget hi thaizing March 5 ah China Cozah parliament an thu lai i an fehter te lai ti a si. Nikum 2014 caah a hman mi ralkap budget hi $131 billion a si i tukum 10% a kai ter ah cun $144 billion a si te lai. A tu US ralkap budget caah Obama nih a halmi hi $585 billion a si ve. 

Hiti China ralkap budget a kai hi a innpa le a ral a si mi Japan le India caah cun thin phang ngai a si. India le Japan zong an ralkap budget an kai ter ngai ve cang. 

Kawl Ralkap nih Chin Evangelist Phaisa An Hal Hna: Kan hnu thla Feb 17 ah khan Chinram chung Paletwa peng ah kawl ralkap Battalion 289 nih evangelist pawl phaisa kyat 180,000 an hal hna tiah Chinland Guardian nih a tial.  

Hiti phaisa an hal hna nak a ruang cu Paletwa peng uktu sin in nawl peknak zei hmanh lak loin ka kip ah an kal i thawngtha an chim mi hi a phung a si lo tiah kawl ral kap nih an ti hna. Voidang zongah peng uktu sin in nawl peknak lak a rak um bal lo ti a si.

Chinram Caah Abiapi Tak Mi Kaladan Project Cu 2017 Lei Lim Dawh An Si:  India ram khualipi hlun Kolkata le Chinram a pehtu Kaladan rili lam cu tukum 2015 dongh lei ah hman khawh ding in rak ruat a si nain riantuan tu chambau ruangah le a herhmi thilri chanh a harnak tete a um caah 2017 lei lawng ah hman khawh ding a si te men lai tiah riantuan tu nih an chim tiah 7Day News nih a tial. 

Kaladan rili lam hi India ram Kolkata khuapi in a ra i Rakhine ram Sittwe le Chinram Paletwa khua panh pah in Mizoram lawngtlai ah a lut ding a si. Hi lam an lim tikah cun India ram chuak thilri vialte nikhat chungah kan Chinram a rak phan kho lai ti nak a si. Kaladan Project a biapit ning ka tial mi hika rel khawh a si.

*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!