Thawngpang Bultan (March 6)

Thantlang Peng Lam Cawhtu Company Cungah Cheukhat An Lung Tling Lo: Thantlang peng lam cawh tu cheukhat company cu nawl ngeitu nih an cawh mi lam an lim le lim lo, an cawhmi a tha le tha lo a hmun ah zoh piaknak um loin 'an lim cang' tiin phaisa chuah khawhnak Nay Pyi Daw ah ca an tial piak hna caah Thanglang peng khua bawi cheukhat an lung  a tling lo ngai tiah The Hakha Post nih a tial. 

Hi kong he pehtlai in peng uktu Vuanthawk sin an report i tuanvo ngeitu pakhat nih 'hihi cu nan mah khuate bawi nih nan theih a herh lo' a kan ti tiah Salen khuabawi Pu Thang Ding nih The Hakha Post ah a chim. 

Khuate lei lam a cawhmi company cheukhat cu an cawhmi lam an lim hlan hrim ah 'an lim cang' tiin ca an tial piak hna i Nay Pyi Daw ah phaisa an chuah theu ti a si. 

Hakha Ah Kawlmi Khrifa ah Ai Thlengmi 150 An Si Cang: Chinram khualipi Hakha khua um kawlmi 150 leng cu Bethel Khrifabu hruainak thawng in khrifa ah an ni thleng cang i an mah an i hawikawmhnak ding biakinn zong kan hnu March 1 ah khan Hakha Chin-O-Si sang ah honnak an tuah cang tiah The Hakha Post nih a tial. 

Hi mission hi a luancia 2000 in Bethel Baptist Khrifabu nih an rak thawk mi a si. 

Salen Khua Sii-Inn Ah Cantling Riantuantu An Ngei Bal Lo: Thantlang peng Salen khua ah sii-inn an ngeihnak a sau ngai cang nain sibawi cu chim lo, si lei a thiam mi nurse le tta-phua sayama(fa hrintertu) hmanh caan tling an ngei bal lo, a tu zong hi tta-phua sayama cu an pek hna nain khua a phan rih lo ti a si. 

Hiti caan tling riantuan tu an um lo ruangah cozah lei nih an pek mi sii hna zong sii lei a thiam deuh mi an hal hna i cuti cun sii zong an phawt tawn hna tiah an khua bawipa nih The Hakha Post sin ah a chim. Atu hi sii-inn caah le riantuan tu um nak caah tiin tlakrawh iin sak dingah cozah nih ting thawngkhat le zahnih a bawmh hna ti a si. The Hakha Post. 

March 4 Ah Hakha Thal Ruah A Sur I Mipi An Ni Lawm Ngai: March 4, Hakha ah thaal ruah a sur i, khualak lam a khumi a daihter caah khuami an i lawm ngaingai tiah The Hakha Post nih a tial.

Hakha khualak lam cu 2014 kum dih lai hrawng khan Hakha Committee pathum (Kaw tungkaw) hruainak in an kauh cuahmah i, lam a phahtu company nih kattaza an tuahmi kha lung an rialmi dip kha a cung ah an phulh caah khualak cu a khu ngaingai.

Nain,a tu thal ruah a van sur tikah hi a khu mi vialte hi a thianh dih hna i khua lak i chawvah zong a nuam ngai cang ti a si. 

Cozah Cungah 88 Sianghngakchia An Thin A Hung: Ni zaan March 5 ah Rangon khua City Hall pawng i cozah nih mi sawh sawh le palik hmang in hram hram in sianghngakchia an ni pumnak bu a cheu hna mi cu 88 hruaitu nih an cohlang kho bak lo. 

Hi kong he pehtlai in 88 hruaitu hna nih thawng zamhnak an tuah i pakhat cio biachimnak zong an ngei. Hiti pakhat cio biachimnak an ngei ah Ko Ko Kyi le Min Ko Naing cu cozah cung an thin hung nak a lang ngai ti a si. 

Nizaan mi sawh sawh le palik hmang in cozah nih mi bu a cheu hna ah minung tam ngai hma an hmu i 8 an tlaih hna. An tlaihmi hna cu tuzing ah an thlah than cang hna ti a si. Irrawaddy.   


*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!