Thawngpang Bultan (Feb 28)

Feb 28 Ah Chin National Day An Tuah: DC area um Chinmi hna nih avoi 67 nak Chin National Day cu tuan deuh ah khan tuah an rak timh nain nikhua ruangah an tuah than kho lo caah tuni Feb 28 ah an tuah than tiah Salai Lairamthang nih a facebook ah thanh. 

Hiti Feb 20 he ai hlat ngai mi ni caan ah CND an tuahmi kong he pehtlai in Zo Lian Mang Lotung nih 'A tu ah CND tuah cu a fil ngai cang lai,puai sawh2 tuah hna lo pah cang hehehe zei si poh ah tuah khawh lo nak ah cun nan tuah khawh mi poh kha tha tuk ko' tiin a lungtlin lo nak a phuan ve. 

US Nih Bosnian Refugee 150 Leng An Ram Ah A Kuat Than Hna Lai: 1995 Bosnia ram chung ral lio muslim 8,000 leng thahnak ah an ni tel ve tiin an puhmi hna Bosnia refugee 150 leng cu US nawlngei tu nih an ram ah kuat(deport) than an timh hna tiah The New York Times nih a thanh.

Mah 1995 muslim pawl thahnak ah ai tel ve mi Bosnia refugee hi US ram chungah 600 leng an si men lai tiin an ruah. Cheukhat cu citizenship zong an ngah cang ti a si. Bosnia ram ah hin kum li chung (1992-1995) ral a rak tho i minung 1oo,000 leng an rak thi, hi ral ruangah US le a dang ram ah refugee in an kal cio hna.

A Voi 42 Nak TABC Civui Hriangkhan Khua Ah An Tuah Lai: Thantlang Association Baptist Church(TABC) hruainak in kum fatin tuah tawn mi civui cu Feb 27 in March 1 tiang Hriangkhan khua ah an tuah lai tiah The Chinland Post nih a tial. 

Hi civui ah cawnpiak tu ding an sawm mi hna cu Australia in a rak tlawng mi Rev. Jafeth Lian le Za Kung Ling an si ti a si. Hriangkhan ah TABC civui cu 1989 ah voikhat an rak tuah bal cang caah tuhi a voi hnih nak a si lai.

Hakha HBA Missionary Museum An Hon Cang Lai: Hakha um HBA zung tiin rak theih tawn mi kha HBA Missionary Museum tiin a min thlennak le onnak cu tuni Feb 28 ah tuah a si lai tiah The Hakha Post nih a tial. 

"Hi Missionary Museum hi siangbawi Dr. East nih 1907 ah a rak sakmi a si. Cu lio ah East Bungalow ti a rak si. Cun a hnu ah Chin Hills Baptist Association Office, cun Missionaries Head Quater ti le HBA Office, HBA GS Quater tiin kum 107 chung hman a rak si. Atu cu Chin Missionary Museum tiin thlen le honnak tuah a si lai. Hi honnak hi A voi 19nak HBA Triennial General Meeting pi chanh in hon kan timh", tiah HBA GS Rev. Paul Tum Ceu nih Hakha Post ah a chim.

NCCT le Myanmar Peace Centre Riantuantu An Ni Tong: Tuni Feb 28, Thailand ram Chaingmai khuapi ah tlangcung hriamtlai phu vialte ai-awh tu NCCT le MPC riantuan tu cheukhat tonnak an ngei i March thla lai hrawngah UPWC le NCCT i ton than ding zong hnatlaknak an ngei ti a si. Hiti an ni ton tikah rampi huap kahdaih min thutnak ding an ceih than te lai. BBC 


*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!