IS Ralhrang Nih An Tlaihmi Pa A Sa An Chumh i A Nu An Ei Ter: Iraq ram Mosul khua ah nu pakhat cu IS ralhrang pawl nih an tlaihmi a fa tlanh dingah IS ralhrang sinah a va kal i IS pawl nih buh le sa an dangh i a ei dih hnu ah 'na ei mi kha nangmah fa pa sa a si' an ti tiah IS a tu ve mi UK pa nih The Sun sinah a chim tiah Daily Mail nih a tial.
Mah nu hi IS ralhrang sin a phak ah cun tha tein an chonh i hlaphakti hna an dangh ta hnu ah hiti a fa sa le rawl an dangh hi a si. Rawl an dangh lio ah cun IS pawl hi an tha ngai ko tiin a rak ruah i ai nuam ngai ti a si.(Daily Mail hi UK ah zumh ngai mi le rel ngai mi newspaper pakhat a si). Mirang in rel a duhmi nih hika rak click te uh.
Australia Nih IS Phomhtu Ralkap Training Petu Ding A Chap Rih Lai: IS ralhrang pawl a dohtu Iraq cozah ralkap training pek dingah Australia nih Australia raltuk thiam 300 hrawng a kuat rih lai tiah BBC nih a tial.
Atu lawlawse Iraq ralkap training petu Australia ralkap hi 200 leng an um cang, 300 leng a kuat rih ah cun let hnih deng in a chap ti nak a si. Australia nih hin Royal Australian Air Force vanlawng in kan hnu October in IS ralhrang pawl a rak phomh cang hna.
Ka Chim Ding Hi Obama Upat lo Langhternak Caah A Si Lo: Israel Prime Minister Netanyahu cu thaizing March 3, US Congress ah Iran nuclear kong chim ding a si. Hiti Congress ah a chim lai ding speech hi 'President Obama upat lo nak langhternak caah a si lo' tiin tuni Washington ah a chim cia.
A tu lio Obama nih Iran a chonh ning hi a nem tuk in Netanyahu le Republican pawl nih an hmuh. Obama nih a kal pi ningah cun Iran nih Uranium(nuclear bomh sernak caah a biapi bik mi thilri) hi cu a ngeih awk a si ko a ti. Iran nih Uranium a tlai peng ko ah cun nuclear bomh ah a ser sual lai ti an phang cio. Iran le Israel cu uico le meheh an lo caah Iran nuclear a ngeih sual ah cun Israel ram cu minute tlawm te chungah vutcam ah a can ter khawh mi a si.
Netanyahu nih thaizing Congress a biachim tik ah hin Iran nuclear kongah hrang deuh in chon ding le sipuazi phihnak hna zong chap ding in US a forh te lai. BBC, The Guardian
North Korea ah Canada Pastor Pakhat A Tlau: Canada ram Toronto khuapi ah pastor a tuan mi Soo Lim cu kan hnu January 31 ah khan North Korea a lut nain tutiang a thawngpang theih khawh a si lo tiah The Telegraph nih a thanh.
Hiti pastor pa a tlau hi zeiruangah dah a si timi Canada cozah nih an fehter rih lo nain North Korea uktu nih an tlaih men lai tiin ruah a si.
NCCT le UPWC I Ton Than Nak Ding Ni A Fiang Cang: Kawlram chung kahdaihnak tuah khawh ding caah ai zuam cuahmah mi tlangcung hriamtlai phu ai-awhtu NCCT le cozah lei ai-awhtu UPWC cu a ralaimi March 16, Rangon khua ah an ni chon than cang lai tiah Irrawaddy nih a thanh.
Tutan tonnak hi NCCT le WPWC kar i tonnak a voi 7 nak a si lai. Hiti an ni ton tikah rampi huap kahdaihnak min thut ding kong lawng si loin ralkap lei kong(military affairs) le Kachin ram, Kokang le Shan ram hna ah i kahnak a zor khawhnak ding hna ceih a si lai ti a si.
*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!
No comments:
Post a Comment