Thawngpang Bultan (March 3)

US Secretary of State John Kerry Nih Kachin Nu Laksawng A Pek Lai: Kachin ramchung daihnak a um khawh nak hnga tiin rian a tuan mi Kachin Peace Network co-founder a si hlei ah nu le pa thlendannak a zor khawhnak caah ai zuam cuahmah mi Gender Equality Network timi zong a dirh tu a si mi Kachin nu May Sabe Phyu cu US ram Department of State nih March 5 ah 'International Women of Courage Award' timi laksawng an pek lai tiah Irrawaddy nih a thanh.

Sabe Phyu hi Kachin ram chung kawl ralkap le KIA kar i kahnak a daih khawh nak hnga caah biatak tein a cawl cang, nu le pa thleidan nak le nu cung ah sersatnak tibantuk a tlau khawh nak ding caah ramchung ram leng rian a tuan mi a si. Hiti a cawlcangh ruangah 2012 zongah khan kawl cozah nih ta-za an rak cuai bal cang. Anih hi kum 39 a si i fa 2 a ngei cang mi a si. 

Bill Gates Nih Vawleicung Mirumbik Sinak A Lak Than Hoi: A ho dah vawleicungah a rum bik timi hlathlainak cu Forbes Magazine nih tukum zong a tuah than i Microsoft ngeitu US mirum pa Bill Gates nih pakhatnak a ngah than. 

Bill Gates a ngeimi phaisa dihlak hi $79 billion a si. Kan hnu kum kumkhat chungah a ngeihmi phaisa $3 billion leng a karh. A nih hi a luancia kum 21 chungah voi 16 tiang vawlei cung a rum bik a si cang. Kawlram 2015-2016 kumkhat chung a budget khi $23 billion lawng a si.BBC 

1. Bill Gates $79.2bn (Microsoft)

2. Carlos Slim Helu $77.1bn (Phones and construction in Mexico)

3. Warren Buffett $72.7bn (Global investor)

4. Amancio Ortega $64.5bn (Zara and other fashion chains)


5. Larry Ellison $54.3bn (Oracle data storage technology)

Kawlram Ah Thluachuah Phortu Tiin Ruahmi Vui Rang An Tlaih: Kawlram chung thingram lei riantuantu hna nih kan hnu Feb 27 ah khan thluachuah phortu tiin kawlmi hna nih an ruahmi kum 7 a si mi vui rang cu Pathein ah an tlaih tiah Irrawaddy nih a tial. 

Mah an tlaihmi vui hi 6.3 feet a sang. Vui rang hi kawlmi tuanbia ah a biapi ngai mi pakhat a si ve. An siangpahrang hna nih an rumnak le an nawlngeihnak langhternak caah vui rang an ni chiah tawn. Vui rang an ni cuh ruangah Burma le Thailand cu 16 century ah an rak i phomh bal ti a si.

Kawlram chung Sianghngakchia Kong A Linsa Chin Leng Mang: Kan hnu Feb 14 ah cozah le sianghngakchia kar fim cawnnak lei upadi remh ding hnatlaknak an ngeih mi cozah nih a buar than an ti ruangah kawlram chung sianghngakchia tampi nih lam an zawh than i kawl media tam deuh ah cun sianghngakchia pawl an hmanthlak, palik nih an khamhnak hna hmanthlak le thawngpang lawng te a khat ko cang. 

Cheukhat sianghngakchia nih lam an zawh, cheukhat nih rawl ei lo in an duhlo nak an langter cio. Phungki zong nih biatak tein an tanhpi ve hna. Palik nih sianghngakchia an ni pumhnak zong cheu ding in an timh len, hram hram in an cheu hna ah cun 88 lio bantuk hna a chuak sual lai an phang cio. Cozah cu a lu a ri ko cang lai! 


*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!