Hakha Market Ah Ar Zuar An Khap: Ar puul a tlung lai ti a si caah Hakha market ah ar zuar rih lo dingin Hakha Sipyin lei nih ca an pek hna caah market ah ar zuar ding a um ti lo ti a si.
“Kan hnu zarh Ningani (February 27) hrawng khan ar zuar ding a um ti lo. Monywa lei ah ar puul a tlun caah nan zuar rih lai lo tiin ca an kan pek” tiin Hakha Market ah ar a zuar tawntu Pi Tin Tin nih Hakha Post ah a chim.
Kawlrawn lei ah ar puul a tlung ko nain Hakha lei ah cun a tlung rih lo caah arti man zong hlan ning tein a si rih.February 26 chuak Democracy Today ah Sakaing ramkulh i a nganbikmi Monywa ar zuatnak ah ar zawtnak a tlung i ar 1488 le mimte 23000 tiang an thi tiin a langter. The Hakha Post.
Cozah Thlahlawh A Kai Lai Ti A Si Caah Hakha Thil Man A Kai Ve: April thla thawk in cozah thlahawh a kai lai ti a si caah Hakha ah rasen ARB tazaih tun khat Ks. 35,000 in rak zuarmi tawn mi kha Ks.40,000 a phan cang, a rauh hlan ah sa man zong Ks.6000 kha Ks.7000 a kai lai ti a si.
Cozah thlahlawh April thla in a kai lai tiah ceih a si caah thilman dirhmun hninh aa timmi a lo. Nain atu tiang Hakha dawr thil man cu a dai rih. "Cozah riantuan zung cheukhat nih April thla thawk in cozah thlahlawh a kai lai tiah an chim nain a kainak ding kong zeihmanh kannih zung cu an kan chim lo", tiah Hakha zung riantuan pakhat nih a chim. The Hakha Post.
Shan Hriamtlai Phu SSA-South Le Kawl Ralkap An Ni Kap Than: Kan hnu Union Day ah kahdaihnak kan ser hrim lai tiin biakamnak min a rak thu cangmi Shan hriamtlai SSA-South le kawl ralkap cu kan hnu Feb 28 ah khan an ni kap than tiah Irrawaddy nih a tial.
Mah an ni kahnak hi nazi pahnih chung a rau i a thimi cu an um hrawl lo ti a si. SSA-South hi 2011 ah cozah he kahdaihnak min an rak thut cang hlei ah kan hnu Feb 12 Union Day zongah khan kahdaihnak kan kal pi hrim lai timi biakamnak min an rak thut cang. A tu bantuk in i kahnak a chuah than tikah SSA-South le kawl ralkap kar zumh lo nak a fak chin lai ti a si.
Obama Nih Iran A Chonhning Hi Nuclear Sernak Lam A Kawl Piak A Si: Hi bia hi tuni US Congress ah Israel Prime Minister Netanyahu nih a chim mi a si. Obama nih Iran nuclear hriam chiahter ding a chonhbiak ning hi Netanyahu le Republican pawl an lung a tling lo, Iran nuclear hriam sernak lam a ser piak a si an ti. Netanyahu nih cun Iran hi vawleipi caah tih a nung mi a si a ti.
Obama nih 'Netanyahu a biachim hi a thar a um lo,ka ruahcia mi te a si ko. Zeitindah Iran chonh awk a si timi lam dang zong a chuahpi mi a um hlei lo' a ti ve.
Australia Mi Pahnih Indonesia Nih Thah Ding Hmun Ah An Kal Pi Cang Hna: Bing an phorh ruangah Indonesia cozah nih an tlaih hna i thihdan an pek mi hna Australia mi Andrew Chan le Sukumaran cu Feb 4 zingka(Indonesia caan) ah thah ding hmun ah an kal pi cang hna tiah BBC nih a thanh.
Hiti Australia mi pahnih thah ding ah Indonesia cozah nih bia a chah mi hi Australia cozah nih thah lo ding in a nawl leng mang hna nain an co hlang duh lo. Atu thahnak hmun ah an kal pi hna lio ah Andrew Chan cu Bible ai lak i a hawipa cu pencil le paper ai lak ve ti a si.
*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!
No comments:
Post a Comment