Thawngpang Bultan (March 9)

Republicans nih Iran Ca An Kuatmi Obama Nih A Nih Sawh: Republican senators 47 leng nih nuclear hriam kong i chonhnak he pehtlai in Iran ca an kuat mi cu President Obama nih a soisel i a nih sawh hna tiah BBC nih a thanh. 

Mah Republicans an cakuat ah hin Iran nuclear deal kongah Obama le Iran kar hnatlaknak an ngah mi vialte cu Congress nih a hnatlak pi lo ah cun san a tlai lo ning ralrin an peknak hna ai tel. Republican le Israel Prime Minister Netanyahu nih Iran nuclear chiahter ding kongah Obama a kal pi mi a nem nak policy hi an duh lo ngai, hrang deuh in chonh seh ti an duh. 

FA Cup Quarter-final Ah Man U An Tap I Arsenal An Mirh: Tukum FA cup caah quarter-final cu tuni Old Tratfford celhhmun ah Manchester United le Arsenal an cil i Arsenal nih 2-1 in an tei hna.      

Arsenal lei in Nacho Monreal le Danny Welbeck nih an goal i i Man U lei in cun Rooney nih a goal ve. FA cup ah cun Man U cu an thi cang. Arsenal tu hi semi-final an kai kho cang ti nak a si. Tutan an chuihnak Old Trafford ah hin Arsenal nih 2006 hnu in tei nak an rak hmu bal rih lo,atu hi a voikhatnak a si caah an ni lawm khun.BBC Sport, The Guardian

IS Ralhrang Pawl Nih Mawtaw Bike Firtu Pa A Kut An Tan: IS ralhrang pawl nih mawtaw bike firtu a kut an tannak hmanthlak pawl cu internet ah an thlah hoi. Mah ti a kut an tan ah hin hngakchia tam pi zong nih a pawng kam in an zoh ve. An tan mi hi a orh lei kut a si. Tih an nung bak ko. Daily Mail

IS Ralhrang Pawl Nih Libya ah Ramdangmi 9 An Tlaih Hoi Hna:Kan hnu March 6 ah khan Libya ram oil chuahnak ah rian a tuan mi Philipine mi 4, Bangladesh mi 1, Czech mi 1, Ghana mi 1, Austria mi 1 le adang theih lomi pakhat hna cu IS ralhrang pawl nih an tlaih hna tih BBC nih a tial. 

Tutiang ah cun zeitindah an tuah te hna lai ti a fiang rih lo. Japan pa bantuk in an ram cozah cio nih phaisa in tlanh ding in an hal te men lai.

  

Tukum Kawlram Chung Tanghra Phi Ding Nikum Nak 8% in An Tam Deuh: Tlawmpal ah tanghra a phi ding mi sianghngakchia zat hi nikum nak in thawng sawm nga in an tam deuh tiah tanghra campinpuai tawlrel tu nih an chim. 

Nikum kha kawlram chung dihlak tanghra a phi mi 58,0000 an si i tukum cu 63,0000 leng an si ti a si. The Yangon Times

Apple nih Mawtaw Kutka An Onpiak Kho Tu Ding Suimilam A Zuar Cang Lai: Smartwatch timi Apple company suimilam fa te cu a ralai April 24 in an zuar cang lai. A man hi ai dang cio,a chia deuh mi hi $349 in cawk khawh a si i a tha deuh mi cu $17,000 tiang a si lai. Mah sumilam nih coffee zong an cawk piak khawh, mawtaw kutka zong an on piak khawh hlei ah na lung ai cawl ning (heart rate) zong an tah piak kho lai. BBC, Daily Mail


*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!