Hakha GTI Sianghngakchia 80 Leng Thial An Tong Kho Men: 2013-2014 ca cawn kum ah kawlram chung fimcawnnak lei upadi ai thleng ruangah B-Tech a cawng lio mi Civil sianghngakchia 80 leng cu a ralaimi 2015-2016 kum ah hmun dang ah thial an si men lai tiah tuanvo ngeitu sin in theih a si.
Hiti thial an timhnak hna he pehtlai in '2013-14 in B-Tech( Bachelor of Technology) hi tuah a si ti lo caah a kai chap mi an um ti lo. A tu a kai lio mi lawng an tang i hmun dang
ah kan thial law law hna hnga maw kan ti bia a si' tiah cachimhtu Prof. Zaw Myo nih catialtu a reporter sin ah a chim. Thial ding an si ah cun Kalay or Monywa ah thial an si te lai.
Hakha GTI ah hin kum thum an kai hnu ah 'GTI Diploma' certificate an pek hna. Fimcawnnak lei upadi an thlen hlan ah cun GTI diploma hi kum hnih hnu ah an ngah,a dang kum hnih chung B-Tech an kai chap i cu hnu lawngah BE hi Kalay ah an peh chap tawn nain upadi an thlen hnu ah B-Tech hi a um ti lo. BE zong tanghra awn hnu in direct kai khawh a si cang, mark 400 bel ngah a hau ti a si. Hakha GTI nih cun 'Diploma' certificate lawng a pek kho ti nak a si.
Snowden nih Switzerland Ah I Dor A Duhnak A Langhter: US nih internet le social media hmang in vawlei cung a thli tein a ngiat(spy) ko timi a phuang tu Edward Snowden cu US ah kir a duh nain US nawl ngei tu a tih pah hna caah Switzerland ah i dor nak kawl a duhnak kong Switzerland mipi hmai ah video in a langhter tiah BBC nih a tial.
Snowden hi CIA caah rian a rak tuan lio ah Switzerland ah a rak um bal cang. Amah chimnak ah cun Europe ram 21 ah i dornak a kawl cang nain a ho hmanh nih an cohlang rih lo. Tuhi Russia ah a um lio a si.
Tinam-Lungcawi Fellowship nih CNA Caah Meithal An Hlut: Malaysia um Tinam-Lungcawi Fellowship nih kan miphun caah nun thap ngamh in rian a tuan tu CNA caah meithal zun khat an hlut i cawknak ding phaisa zong Col. Solomon Thang Ding sin ah an pek cang tiah Salai T C Lian nih CC facebook group ah a thanh.
Hi Tinam-Lungcawi fellowship hi an dirhnak zong a sau rih lo nain an ni zohkhenh ning le rian an tuanti ning hna zohchunhtlak tak tak an si i Malaysia CRC zongah biatak tein a cawlcang mi an si ti a si.
Tukum CCC in Minung 66 Nih Degree An Lak Lai: Hakha khuapi ah kan zohthla ngai mi Chin Christian College a voi 22nak degree peknak cu March 8, Hakha Baptist Church ah tuah a si lai i minung 66 degree pek an si lai tiah The Hakha Post nih a tial.
Degree pek ding hna cu BTh in minung 33, BA English in minung 22, M.Dev. in 7 le BRE in 4 an si lai.
Jerusalem Ah Palestine Pakhat Nih Mawtaw In Israel Palik A Hliam Hna: Palestine mi pakhat nih Israel khualipi Jerusalem ah mawtaw in Israel mipi a pah chih hna caah Israel palik nu 6 a hliam hna tiah tiah BBC nih a thanh.
Mah mawtaw monghtu Palestine pa zong hi meithal in an kah manh ve caah mitam pi a pah kho ti hna lo ti a si. Palestine pa cu a thi ve lo. Hibantuk in nikum zongah Palestine mi pakhat nih mawtaw in mipi a pah rih hna caah minung 4 leng Jerusalem khua ah an rak thi bal cang.
Hakha Missionary Museum Zoh Duh Ah Ks 500 Pek A Hau: Hakha um HBA zung tiin rak theih cio mi cu Missionary Museum ah thlen a si i zoh a duh mi nih luhman ah upa ks 500 le hngakchia ks 200 pek a hau tiah The Hakha Post nih a tial.
Hi luhman khiah mi a ngei lo mi an um sual ah cun a lak in luh ter le zohter zong a si ko lai ti a si. "Hi hi American in Zophei Christian Church le Laimi Khrihfabu sawmli hna bawmhnak in sakmi a si. Kan Khrihfa tuanbia philhlonak ah hitin hin tharchuah le tuahmi a si" tiah Rev. Paul Tum Ceu nih The Hakha Post ah a chim.
*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!
No comments:
Post a Comment