US Ferguson Duhlonak Langhternak Ah Palik 2 Kah An Tong: Nikum August 9 ah Ferguson,Missouri palik nih minak pa Michael Brown an thahnak kong he pehtlai in hlathlainak an tuah mi report ni zaan ah an chuah, palik bawi Jackson zong a rian chiah a timh beh hnu in nizaan zaan lei ah khan minak pawl nih an duh lonak an langhter than i palik nih mi bu an cheu hna ah hi ti hin an kah beh hna nak a si.
An kah mi palik pahnih hi an thi hraw lo,nain an hma cu a fak ngai. Palik pakhat hi a hmai ah an khen i a dang pakhat hi a liang ah an khen ve ti a si.
Zei hriam nam hmanh aa tlai lomi minak pa Michael Brown an thah ruangah hin Ferguson palik pawl mawtchiat an tong ngai, minak an thleidan an ti hna.BBC
Kawlram Phunghram Remhnak Six-party talks An Tuah Zau Lai: Kawlram 2008 phunghram remh nak kong ceih ding ah mipi le parliament zong nih an rak au pi lengmang mi six-party talks cu tuan ah kan tuah cang lai tiah Pyithawngsuh Hluttaw hotu Thura Shwe Mann nih a chim.
Mah six-party talks ah hin NLD lei in Aung San Suu Kyi, cozah lei in President Thein Sein, ralkap lei in Gen. Min Aung Hlaing, hluttaw pahnih hotu ve ve le tlangcungmi ai-awh tu pakhat an ni tel lai.
Hiti six-party talks tuah dingah nikum November 25 ah khan parliament nih bia an rak chah nain President le ralkap lutlai nih an rak cohlang lo. BBC Burmese
Hakha Palik nih Zu Zuartu Zu An Zuar le Zuar Lo An Check Hna: March 11 in tanghra caminpuai an thawk cang caah Hakha khuachung zu zuar an khap mi cu zu zuartu nih zu an zuar le zuar lo zohfelnak Hakha palik nih an tuah thawk cang ti a si.
Swe Myo Daw le Chin Taung Tan tibantuk zong nih rawl lawng zuar khawh a si lai, zu an zuar ah cun dantat an si lai. Zaan ah hin Duh-yehmu Sang Lian bak nih a vah pi hna, tanghra caminpuai dih hlan chung cu hi ti ning in an check peng lai ti a si.
Zu zuar lawng si loin sianghngakchia dai tein ca an zoh khawh nak hnga lampi a au khuang mi zong dantat an si lai ti a si. Hakha Reporter
Thantlang Lampi Kauhnak Ding Caah Committee An Dirh Cang: Thantlang khualak lam kauh ding Committee thimnak cu March 11, Town Hall ah lampi kam inn ngeitu hna le upa minung 120 nih an tuah cang ti a si.
"Lam kam inn ngeitu vialte zong nih kauh ding an lung a tling dih. Rian Tawlreltu ding Committee zong upa 17 thim in tuah colh a si: Sipin, Peng Thanchonak Committee, Khuanu Khuapa, sang kip in upa pathum cio, sang kip khuabawi hna tiin thim an si", tiah Henry Siang Bik Cung nih Hakha Post ah a chim.
Hi Tawlreltu Committee nih rian cu a herh ning in an tawlrel lai i an i hmaithlak cang lai tiah a cunglei upa sin in theih a si. The Hakha Post
MP Thang Thai Thimnak Ai Cuh Than Kho Men: Thantlang peng Amyotha Hluttaw MP Pu Paul Thang Thai cu 2015 thimnak ah aa cuh ti lai lo, tiah bia a leng nain amah nih cun 'ka dam ahcun kaa cuh than te ko lai' a ti tiah Rev.John F. Thawng Hlei Cung nih The Hakha Post ah a chim.
Hakha Ah Private Bank Thar A Um Lai: Hakha ah 2015 chung ah Kanbawza Bank a um lai. Hakha Matupi lam Pu Ko Ni inn phaisa sing 600 in an cawk. An theh lai i a thar in an sak than lai. “Hakha cu Chin ramkulh khualipi a si bantuk in tlamtling te le zohdawh deuh ngai in sak an timh”, tiah innpa Pu Sang Luai nih The Hakha Post ah a chim. Hakha ah private bank a si mi CB Bangk cu a um nak kumkhat leng a si cang.
*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!
No comments:
Post a Comment