Thawngpang Bultan (March 8)

March 3 ah Eleven Media nih a thlak mi

Kachin Hriamtlai Phu Nih Bing Ekah Thawng Tampi An Ngei: Kachin hriamtlai phu pakhat a si ve mi New Democratic Army Kachin (NDA-K) kuttang ah a um mi Kain-painh-ti peng le Sadon peng hna ah China lei bawmhnak in bing ekah thawng tampi an cin tiah Eleven Media nih a thanh. 

Mah bing an cinnak peng hi China ramri pawngah a si i bing cinnak caah a dih mi phaisa vialte zong China lei mirum nih an bawmh dih hna. Bing an cinmi cu a theipar a chuah tikah China mirum sin an kuat than ve hna ti a si. Ekah 2 cinnak caah kawlram phaisa in ting 40 tiang an bawmh hna. 

Cozah He March Thla I Chonhnak Ah 'O' Hriamtlai Tel An Ni Tim Lo: Kawlram chung kahdaihnak ser ding ah cozah lei ai-awhtu UPWC le tlangcungmi hriamtlai phu ai-awhtu NCCT hna cu a ralaimi March 16, Rangon khua ah i chon than an ni timh, hitik ah hin kawlram chung hriamtlai phu lakah a thawng bikmi 'O' bel cu i tel kan ni tim lo an ti tiah 7Day News nih a thanh. 

'O' hriamtlai phu UWSA hi tlangcungmi hriamtlai bu komh a si mi NCCT le UNFC zong ah member an si bal lo. Ralkap 30,000 leng an ngei i an duh poah in bing an cin. Autonomous region an si caah cozah ralkap zong nih a naih ngam hna lo. China phaisa, China hand phone le China TV a hmang mi an si. Statehood an hal nain Shan le kawl cozah nih a pe duh rih hna lo. 

Sianghngakchia Kongah Suu Kyi Nih Cozah A Mawtchiat Hna: Mi sawh sawh le palik hmang in cozah nih kan hnu March 5 ah sianghngakchia an ni pum nak bu hram hram in a cheu mi hna cu 'cohlan khawh a si lo' tiah Aung San Suu Kyi nih NLD lutlai meeting an tuahnak March 7 ah a chim tiah 7Day news nih a tial. 

Kawlram fimcawnnak lei upadi thlen duh ruangah kawlram sianghngakchia tampi cu lam zoh nak in duhlongak an langhter cio. Hiti duhlonak an langhter mi cu March 5 ah khan cozah nih mi sawh sawh le palik hmang in a rak phomh hna i minung tam ngai hma an pu. 

Nu le Pa I Tlukruannak Kongah Irrawaddy Nih Sung Tin Par Bia An Hal: Kawlram chungah hlasak lei in Chinmi hmai a kan hngalter tu hlasakthiam Sung Tin Par cu Irrawaddy nih kawlram chung nu cungah thleidan nak le nu an covo kong he pehtlaih in a ruahnak an hal. 

Nu cungah thleidannak kong he pehtlai in bia a leh mi hna ah 'Nu bawmh ding le an caah caan tha ser piak ding hi pa pawl kan nawl duh mi hna a si' tiin a leh hna. Tuni Rangon khua ah tuah ding mi International Women's Day zongah Sung Tin Par hla sa ding a si. 

Iran Nuclear Hriam Chiahternak Ah US le EU An Lung Ai Rual: Nuclear hriam chiahter dingah Iran an chonh ning he pehtlai in US le EU ram pawl kan dirhmun ai khat tiah Jone Kerry nih Switzerland a rak tlawn lio ah a chim. 

Iran nuclear chiah ter ding hi US hruainak in UK,France, Germany, China le Russia hna nih March thla dih hlan ah Iran he hnatlaknak ngah an timh. June thla dih ah cun min thut ding timh a si. 

Hiti Obama le adang ram 5 hruainak in Iran an chonh ning hi Israel le Republican pawl nih an doh ngai mi a si. The Guardian 



*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!