Thawngpang Bultan(March 7)

Chin Nu Actress Thet Mon Myint Fa A Ngei Cang Lai: Chinmi nih kan zoh thla ngai mi kawlram actress Thet Mon Myint(Zung Cer Mawi) cu a ralaimi April thla chungah fa pa dawh te a ngei cang lai tiah Yangon Media Group nih a thanh. 

Thet Mon Myint hi a luancia 2012 ah khan kawlram film industry ah an upat bikmi academy lak sawng zong a rak ngah. Nikum February thla chungah khan Tsit Naing he an ni um. 

China Ah Arfi A Hmu Bal Rih Lomi Hngakchia An Um: Journalist minthang a si mi Chai Jing timi nu nih China ram chung thli a thian lo ning zohfelnak a tuah i cu chungah China ram Shanxi province um hngakchia nu pakhat bia a hal. 

Ms Chai: Arfi na hmu bal cang maw?

Hngakchia nu:Ai,ka hmu bal rih lo. 

Ms Chai: Minmei rang teh na hmu bal cang maw?

Hngakchia nu:Ai,ka hmu bal rih lo. 

Mah documentary video hi internet chung an thlah i nazi 48 chungah minung 100 million leng nih an zoh nain China Communist cozah nih a phih piak than hna. BBC 

Japan le North Korea An Ni Chon Than Men Lai: Aluancia 2002 ah khan North Korea nih Japan mi 13 an rak tlaih hna i 5 lawng an rak thlah than hna, a tangmi cu an thi cang an rak ti hna i an konglam zei hmanh an rak thei kho ti hna lo. Mah hna kong hlat hlai dingah ram hnih kar an ni chon pah leng mang nain tha thi in an ni chon kho bal rih lo. 

Hiti i chonhnak hi tuthla chung ah hin thawk than khawh dingah kaphnih hnatlaknak cu an ngei cang tiah The Times of India nih a thanh.Japan nih Korea hi 1910-1945 tiang a rak uk. Korea in Japan a chuah hnu 1948 ah Korea cu North le South in an ni then. North Korea he hin Japan an ni rem bal lo, North Korea nih nuclear bomb kan puah hnawh sual lai a ti leng mang.

Malaysia Vanlawng Kan Hmuh Than Ko Lai: Nikum March 8 ah a rak tlau mi Malaysia Airline MH370 cu 'kan hmuh than ko lai' tiah Malaysia transport minister nih a chim. Zeitindah an hmuh than lai i zeitikdah an hmuh khawh lai ti mi bel cu a langhter ve lo. 

Hi a tlau mi vanlawng chungah hin minung 239 an um.Australia telh in ram tampi nih an kawl pi ve hna. Tutiang hi vanlawng kawlnak ah a dihmi dihlak $120 million a si cang ti a si. Thaizing hi hi vanlawng a tlau nak kum khat a tlin ni a si cang lai.BBC

C. Ronaldo Cu Vawleicung Bawlung Thiam A Rumbik A Si: Goal.com nih vawleicung bawlung chuih thiam lakah a rum bik an thim hna i C. Ronaldo nih Pound 152 million in a pakhatnak a ngah. Messi hi a pahnihnak a si i Pound 145 million a ngei ve. Pathumnak hi Neymar a si i Pound 98 million a ngei. C. Ronaldo le Messi an hlawh cu a dang bawlung chuih thiam nak in a sang deuh ngai.


*** Atang i caw-ngia hmanthlak na click ah kei phaisa ka ngah ve, zangfah tein voikhat tal ka click piak ve hram!