Thawngpang Bultan (Feb 11)

Chinram USDP Nih An Party Zung Hmai Ah Aung San Hmanthlak An Tar: Chin ramkulh USDP party nih Aung San kum 100 tlinnak chuahcam tuak cu Feb 10,Hakha an party zung ah an tuah i an party zung hmai zongah Aung San hmanthlak an tar tiah The Hakha Post nih a tial. 

Hi ni ah Chief Minister Hung Ngai telh in Chinram cozah cabinet,USDP le a dang upa hna zong an kai kho ti a si. "Bochoh Aung San chuah ni philhlonak ding ah February 13 kha 'kan rampi ngakchia hna ni' tiah hman a si. Cu ve bantuk in Bochoh Aung San kum 100 tlin philhlonak ah Chin ramkulh USDP party nih Chin ramkulh peng pakua caah peng khat phaisa sing thum cio dih in atu bantuk cataarnak kan tuahnak a si" tiah Pu Zam Kio nih a chim. 

Labour Party Lutlai Miliband Nih UK Prime Minister 'Uico pa' A Ti: UK cozah sertu Conservative Party lutlai Prime Minister David Cameron le opposition party Labour lutlai Ed Miliband hi uico le meheh bak a lo mi an si. Parliament chungah an ni phomh leng mang, an kut ke an hman lo lawng a si. UK ah cun bia an ni alnak hi LIVE in thlah a si i zoh zong a nuam ngai tawn.

Tutan Milliband nih 'uico pa' a ti nak hi HBSC's Swiss bank nih mirum pawl tax pek a hrial ter hna,mirum pawl nih Conservative party phaisa an bawmh caah zei action hmanh a la lo tiin Ed Milliband party nih an puh hna. Ed Milliband nih 'Uico Prime Minister kha hlutu uico(doggy donors) hna nih an kulh' tiin UK parliament chungah a ti. Video in zoh duh mi nih hika rak click te uh. BBC

Thaizing Union Day Ah KIA An Kai Lai Lo: Thaizing Feb 12 ah tuah dingmi Union Day ah tlangcung hriamtlai phu 16 an sawm hna nain Kachin Independence Army(KIA/O), Ta'ang National Liberation Army le Karen hriamtlai phu pakhat a si ve mi KNPP hna cu an kai lai lo tiah BBC nih a chim. 

Thaizing Union Day ah hin cozah le tlangcung hriamtlai phu kar ah kahdaihnak kan pehzulh lai ti biakam hnatlaknak min an thut lai ti a si. Kawlram Independence kan rak ngah hlan Feb 12,1947 ah Chin,Kachin le Shan mi hna nih Burma Proper he i fonh ding hnatlaknak Panglong Agreement min an rak thutni kha Union Day tiin auh a si. Chinmi ai-awh in Pu Kio Mang,Pu Hlur Hmung le Thawng Za Khup hna nih min an rak thu ve.