Thawngpang Bultan (Feb 22)

Rangon Laimi Nguai-Hluai Tuahtu Kong Facebook Ah A Linsa Ngai: Facebook min Phaizawng Zingbawi ai timi pa nih Laimi facebook group pakhat a si mi Miepi group ah 'YANGON LAIMI (HAKHA LE THANTLANG HRIHHRUAI) SINAH TANGKA HLAMNAK BORUAK' timi tlangtar in Rangon um Laimi nguai-hluai tuahtu cung a lung tlin lo nak a hung tial i nazi 8 chungah minung 116 nih 'like' an pek i 'comment' 27 tiang an pek manh. 

Phaizawng Zingbawi nih cun 'Kan phaisa a phan maw, tiah phone chawnh hmanh hi pacan cuh in zaang i pek ta a hau. An innchung va luh chinchin cu ralkap chan lio i ralbawi hmaiah tthutdir ko khi kan hluan. Kaa khat hmanh chawnh kan tong lo. “Rak tthu” ti cu chim lo, mifir satlai hmuh bang zoh kaa huah caan a tlawm ti lo. An innchung ti hrai khat din awkah hmaikhah lonak kaltak ta a hau. Uah vialte lakah a pit!' tiin Rangon um nguai-hluai tuahtu kong a hung phuang i mi tam ngai nih an mah pumpak an tuar bal ve nak zong an hung phuang chin cio ve. 

Hibantuk a tong bal ve mi Jolly Cung zong nih 'Hmaan bak kei zong nai kawlram kava tlawn ah tangka kaikuat cia mi ka va la le chonh hmanh kn tong tak lo.An mah tangka a va hal mi te kn lo tuk reng' tiin Phaizawng a capar ah a hung comment ve. Pakhat pa bel nih cun 'Western Union' in pei minute pakhat ah kuat khawh a si ko cu, hibantuk ah cun kuat ti lo ding a ti ve. 

Phaizawng Zingbawi theih tawk ah Rangon um Laimi nguai-hluai tuah tu dawng 9 an si i North Dagon um mi dawng khat lawng nih tha tein mi an biak chonh ti a si.

KNU Hruaitu Hna Lak ah Ruahnak Ai Kalh: Kan hnu Union Day ah KNU Chairman Mutu hruaimi nih kahdaihnak kan pehzulh lai timi biakamnak min an thut mi cu KNU Vice-Chair nu Naw Zipporah Sein nih Central Committee biachah ning in a si lo tiin a soisel tiah The Myanmar Times nih a tial. 

KNU Chairman Mutu hruaimi phu nih Union Day ah biakamnak min an thut lawng si loin NCCT a riantuan ning zong an tlung tlin ti lo caah an mah tein cozah kan chon cang lai tiin kan hnu zarh ah khan an chim cang. 

KNU hruaitu lutlai veve Mutu le Naw Zipporah Sein an ruahnak hi ai kalh ngai leng mang. Kan hnu kum UNFC member si nak in Mutu nih KNU chuahpi hna zongah khan Naw Zipporah Sein nih cun a rak duh lo ngai,hi lio ah an mah pahnih an ruahnak a rak kalh ngai cang mi a si. 

NCCT le UPWC an Ni Chon Than Cang Lai: Nizaan Feb 21 ah khan tlangcungmi hriamtlai phu ai-awhtu NCCT le Myanmar Peace Centre in riantuantu hna cu Thailand ram Chiangmai khua ah tonnak an ngei i a ralaimi March thla chung, Rangon khua ah NCCT le cozah lei ai-awhtu UPWC i ton than ding hnatlaknak an ngei tiah BBC Burmese nih a tial.  

Tutan an i ton than ding hi a voi 7 nak a si te lai, hihi kan hnu September tonnak hnu in a voikhat nak a si lai. November thla i KIA headquarters Laiza an kah hnu in kap hnih kar i zumhnak zong a rak zor ngai ti a si.