Thawngpang Bultan

Amyota Hlutdaw Nih Setan Bill Pakhat An Fehter Cang: Setan bills lak ah pakhat a si mi kawlram chung milu a karh ning khamhnak upadi cu mitam pi nih soisel a si nain tuni Amyota Hlutdaw ah MP tam deuh tlaknak in fehter a si cang i Pyituh Hlutdaw nih a fehter ve ah cun a nungmi upadi ah a si cang  lai. 

Hi upadi soisel a tonnak a ruang cu chungkhar pakhat nih kum thum hnu lawngah fa ngeih khawh ding timi hi a si. Mah upadi hi kawlram hmun pumpuluk ah hman an timh lo, hmunhma cheukhat lawngah hman ding ti a si caah mi thlendan(discrimination) a si tiin mi tampi nih an doh ngai mi a si. Abik in Rohingya pawl caah tuah mi si dawh a si. BBC

Ukraine Cozah nih Debaltseve Khua An Chuah Tak Cang: Ukraine cozah le Russia duh tu hriamtlai pawl kar i kahnak cu Debaltseve khua ah a fak chin leng mang hlei ah Russia President Putin zong nih mah khua chuah tak awk ah a rak hal len caah Ukraine cozah nih an chuah tak cang tiah BBC nih a tial. 

Kan hnu zarh ah kap hnih kar kahdaihnak minthut a si i a dang hmunhma ah cun daihnak a leng pah nain mah Debaltseve khua bel hi kap hnih caah a biapi ngai mi a si caah i kahnak a rak zual chin. Atu bantuk in Ukraine cozah nih mah khua an chuah tak hnu cun daihnak um kho dawh in a lang.

Kokang Ram Uk Dingah Ralkap Bawi Saw Myint Oo Rian An Khinh: Nizaan ah Kokang ram chung vialte ralkap nih a uk lai tiah kawl cozah nih an thanh hnu in tuni ah Gen. Min Aung Hlaing nih a kuttang um ralkap bawi Saw Myint Oo cu Kokang ram uk tu ah rian a khinh cang tiah BBC nih a tial.

Kokang ram chung ah a herhmi biaceihnak, ram hruaining(administration), humhimnak (security), chawlehnak vialte hi ralkap kuttang ah chiah dih caah Saw Myint Oo nawl loin zei hmanh tuah khawh a si lai lo ti nak a si. Phung a buar mi cu ralkap nih a herh zat in dan an tat khawh, thihdan hmanh pek khawh a si ti a si. BBC