Thawngpang Bultan (Feb 16)

Kawl Ralkap Nih KIA Zong Phomh A Timh Cang Rua: Kokang hriamtlai phu le kawl ralkap kar i kahnak ah Kachin, Shan le Arakan zong nih an kan bawmh tiin Kokang hriamtlai lei nih an chim hnu in kawl ralkap thazang Kachin ram ah an karh ngai caah KIA zong an kan phomh kho tiah KIO riantuan tu pakhat nih VOA Burmese ah a chim. 

Kachin ram ah tukar kawl ralkap an karh lawng si loin kan hnu Feb 11 in KIA  headquarters  umnak Laiza pawng kam ah meithal ngan in an rak kah leng mang cang ti a si. Kawl ralkap lutlai Gen. Min Aung Hlaing zong nih Kokang a bawmhtu vialte cu 'an tuh bang in an zun lai' a ti ve,a ho set dah a ti hnawh ti cu a fiang lo nain. 

Nikum November thla ah kawl ralkap nih Laiza an kah hnu in kap hnih kar i rem lo nak a zual chin i kan hnu zarh tuah mi Union Day zongah KIA cu an kai duh lo.  

Japan Economy A Van Nung Kho Than Cang: Vawleicung economy nganbik pathumnak a si mi Japan economy cu kan hnu kum 2014,July-September kar thlathum chungah 0.4%tiang a rak tla/a fa deuh nain kum dongh lei October-December kar thlathum chungah 0.6% in a kai/a ngan deuh than caah sipuazi tlaknak(recession) in a luat khawh than ti nak a si. The Guardian, Reuters 

Hlasak Thiam Minthang Lady Gaga Hnakruh Ai Hmuh Cang: Micheu khat nih khuachia a lo a timi zong an um nain vawlei cungah a hlasak mi le a design ruangah a lar ngai mi US nu Lady Gaga cu a tlangval pa Taylor Kinney he kan hnu Valentine's Day ah khan i hamnak an tuah cang. An mah pahnih hi 2011 'You and I' timi video an rak i thlak lio ah ai hmu mi an si. BBC NEWSBEAT 

Russia Cu US Caah North Korea Nak In Tih A Nung Deuh Cang: Gallup company nih US caah zei ram hi dah tih a nung bik timi theih khawhnak ding caah mipi ruahnak an lak. An lakmi chungah 18% nih Russia hi tih a nung bik an ti i 15% nih North Korea an ti, 12% nih China, 9% nih Iran le 8% nih Iraq an ti tiah The Washington Times nih a tial. 

Kum dang ah cun North Korea hi US caah tih a nung bik an ti tawn nain tukum ah cun Russia nih a van lonh than. US le Russia hi Ukraine kongah nikum in an ni rem lonak a zual ngai ngai.