Thawngpang Bultan(Feb 3)

Obama Nih 2016 US Budget Caah 4 Trillion A Chuahpi: Tukum October thla in ai thawk ding mi US 2016 phaisa kum caah President Obama nih 4 trillion a chuahpi i Republican nih control mi Congress nih fehter(prove) ding long a tang cang. Hmaikum budget hi tukum budget nak in 6.4%  a tam deuh. Hmaikum chung cozah nih a hmuh ding phaisa hi $3.5 trillion, deficit(tangka bau) hi 474 billion hrawng a si lai tiin ruahdamh a si. Hi vialte phaisa hmuhnak dingah US ramchung&ramleng um mirum hna sin in tax tam deuh lak an timh. Biadangah,a tu lawlawse US leiba hi 17 trillion a si, hmaikum a budget nak in letli leng a si.BBC,USA Today,The Wall Street Journal. 

1 million=Tinghra                                                 =1,000,000
1 billion=1,000 Million (Ting thawnghra)       = 1,000,000,000
1 trillion=1,000,000 Million(Million tinghra)=1,000,000,000,000



Nu Pahnih + Pa Pakhat Nih Fa Ngeih Khawh A Si Cang Lai: Nu pahnih le pa pakhat DNA hmang in fa hrin khawhnak phunglam cu nihin Feb 3, UK parliament(House of Commons) ah sau ngai an ceih hnu ah MP tam deuh nih hnatlak pi a si. Hi phunglam hi House of Lords(upper house) MP nih an lungtlin pi ve ah cun upadi thar ah ai chuah lai i UK cu vawlei cung ah hi phunglam a hmang hmasa bik a si te lai. Hiti nu 2+pa 1 in fa hrin khawh a thatnak pakhat cu nu pakhat ci(genetic) in a chuakmi zawtnak hna a fa sin chonh khawh a si lai lo ti a si. Mah phunglam fehter a si ah cun kumkhat ah hi hriamnam hmang in hngakchia 150 hrawng an chuak kho lai. Hi hriamnam hi Newcastle University nih an ser mi a si.BBC. 


Tutan Education Reform Kongah NLD Mawtchiat A Tong: NLD central executive committee riantuan tu a si mi Dr. Thein Lwin cu phu(organization) dang a si mi National Network for Education Reform ai-awh in tutan kawlram fim cawnnak lei upadi remh ding ceihmainak four-party talks ah NLD nawl peknak tel loin ai tel ruangah NLD nih aziizut ding in cathluan(statement) an chuah tiah Irrawaddy nih a tial. NLD nawlpeknak tel loin hibantuk ceihmainak ah ai tel hi NLD phunglam a buar ti a si. Kawlram fim cawnnak upadi thar hi sianghngakchia nih an duh lo caah Mandalay in Rangon tiang lam a rak zawh cuahmah mi zong an um i cozah le upadi sertu he bia a ruah mi zong an um ve. Hitluk kawlram fim cawnnak upadi thlen ding sianghngakchia an ni zuam cuahmah lio ah NLD nih Dr. Thein Lwin a ziizut ding catluan an chuah hi sianghgakchia cawlcanghnak a nuar ter tiin The Action Committee for Democratic Education (ACDE) nih NLD a mawtchiat ve.