Tuni Hakha CND ah German Pa A Paih Ve: Kawlram caan in 1pm ah Hakha tuahmi CND paihnak cu thawk a si i Germany ram in a ra mi pa lian pa Mike zong a paih ve tiah The Chinland Post nih a tial.
Hi pa aa paih lio ah mipi zong nih an zoh duh ngai ti a si. Chuncung pa a liangcen a si mi pa nih voihnih tiang pehtlai in a tei.
Tutan Hakha CND ah Pu Lian Uk Telh In CNF Upa 8 An Ni Tel Lai: Thaizing tuah ding mi avoi 67 nak CND ah CNF upa zong sawm an si i minung 8 an ni tel kho lai tiah The Hakha Post nih a tial.
A tel ding hna cu 1. Pu Lian Uk, 2. Dr. Sui Khar, 3. Pu Khua Uk Lian, 4. Pu Ral Hnin, 5. Pu Thang Yen, 6. Pu Thet Ni, 7. Pu Hung Mang, 8. Pu Bil Cung hna an si.
Kokang he I Kahnak ah Kawl Ralkap Bawi Pakhat A Thi Rih: Kan hnu nihnih ni zaan ah khan Kokang ram Lone Htan khua ah Kokang hriamtlai le kawl ralkap kar i kahnak ah kawl ralkap Captain Ye Sithu Aung a thi tiah Irrawaddy nih a tial.
Hi ral ruangah ralbawi telh in kawl ralkap 50 an thi cang i 100 leng hma an pu ti a si. Kokang lei zong minung 18 leng an thi ve cang ti a si.
Thailand Prime Minister Hlun Yingluck Thawng An Thlak Kho Men: Mi sifak le khuate lei um Thailand mipi nih an uar ngai nain mirum deuh le khuapi um mi nih an huat ngai ve mi Thai Prime Minister hlun Yingluck cu lei tuahtu hna cozah phaisa a bawmh ning hna a hman lo tiin cozah sihni lutlai pakhat nih ta-za a cuai i beiceihnak zung nih 'a sual ko' a ti ah cun kum 10 leng thawng thlak khawh a si te lai tiah BBC nih a tial.
Nikum buainak ruangah Yingluck cu Prime Minister si nak in May thla ah khan an rak phuah i ralkap nih uknak an lak beh. Tlawmpal ah kum nga chung politics khel kho lo ding in dan an tat rih.
Theihtlei: Kok-ti(golf) tuk le chess i kah hi kan Chinram Chief Minister Pu Hung Ngai a huam ci a si an ti.Bawlung chuih zoh zong a huam tuk ti a si. The Chinland Post.
No comments:
Post a Comment