Nawl Aa Ngeihter Tuk Ruangah Korea Nu Thawng An Thlak: South Korea nu Heather Cho hi a pa ngeihmi Korean Air company ah vice-president atuan mi a si. Nikum December 5 ah khan a vanlawng riantuantu pakhat nih ei ding changreu(macadamia nuts) cu bag in a pek, kheng pum in a pek lo mi hi a thin hung caah a zuang deng mi vanlawng a dir ter than hlei ah cuti macadamia nuts ape tu nu cu rian in a phuah chap ti a si.
Hi a umzia dawh lo hi media kip nih an hung thanh tikah mipi zong an thin hung ngai cio. Korean Air riantuan tu zong nih a rian in i din seh tiin an hal. Atu cu South Korea biaceihnak zung(court) nih kum khat chung thawng thlak ding in bia an khiah cang tiah BBC nih a tial.
IS Terrorist Cungah US Cian Chin Leng Mang Dawh A Si: Obama nih IS terrorist pawl hloh cikcek ding ah ke ralkap zong hman khawh ding in Congress hnathlaknak a hal hna. Hi bantuk ke ralkap tiang hman ding hal nak hi President Bush chan 2002 hnu in a voikhatnak a si. Atu a halmi hi US Congress ah an ceih lai i tam deuh nih an lungtlin si cun vanlawng lawng si ti loin ke ralkap he IS an phomh cang lai tinak a si.
US nih vanlawng hmang in kan hnu kum June 15 in IS an rak phomh cang. Tutan a biachimnak ah Obama nih'Kan nih cu a phomhtu kan si,ISIL cu a ingtu an si.ISIL cu an sung hrim lai' tiin a chim.
Kawlram Sianghnakchia An Saduhthah A Tling: Kawlram fimcawnnak lei upadi an duh lo ruangah kawlram sianghngakchia tampi nih kan hnu Jan 20 in an duhlonak langhter hram an thawk i kan hnu zarh chungah a zual chin nain nizaan Feb 11 ah sianghngakchia nih an hal mi point 11 cu cozah le upadi sertu hna nih an cohlang cang tiah Irrawaddy nih a tial.
Tutan sianghnakchia nih an balmi ah a biapi deuh mi cozah budget 20% hi fimcawnnak ah hman ding, minority tlangcung mi holh zong cawn chih ding le pumtlamtling lo zong cacawn khawh ding in tuah piak ding timi hna hi an si. Cozah lei nih budget 20% fimcawnnak hman ding hi a ralaimi kum nga chungah kan tlinter lai tiin biakamnak an ngei i adang cu a tlangpi in an cohlang dih ti a si.
Tutan hnatlaknak hi kawlram parliament ah an chuahpi hmasa lai i mitam deuh hnatlaknak in parliament ah fehter a si te lai.
No comments:
Post a Comment