Thawngpang Bultan (Feb 20)

President Ai-awh Biachim Tu U Ye Htut Ai Chuah Sual: Facebook biatak tein a hmang ve mi Minister U Ye Htut cu tuni Hakha a rak phan ah Chin thilthuam pakhat a si ve mi Tidim lei thil thuam he hman ai thlak i facebook ah a hung tar colh. A hmanthlak a hung tar ka ah cun 'Hakha ah a um lio mi Chin pa' tiin a tial hmasa, nain, mi tam ngai nih comment chia in an hung soisel tikah 'Hakha ah a um lio mi kawl pa' tiin a thlen than.

U Ye Htut hi President Thein Sein ai-awh biachimtu(spokesperson) a si hlei ah Ministry of Information zongah vuanci a tuan rih. Facebook ah a cawl cangh ngai, followers minung 150,552 a ngei. Tutan a hung tar mi hmanthlak hi 'like' a pe tu 39,700 leng an si.

D.C Area Chinmi Nih Nikhua Ruangah CND Tuah An Hnon Than: District of Columbia(DC) Area um Chinmi hna nih thazing Feb 21 ah CND tuah an timh nain nikhua a kihtuk caah sianginn an hlannak ti pipe a kuai dih i emergency in remh a ho ti a si caah an tuah kho than lai lo tiin Salai Lairamthang nih facebook ah a tial. 

Tukar cu US a kik tuk, -40C hna a phan caah mipi zong harnak an tong ngai, hi ti a kih ruangah US ram chung minung 19 an thi cang ti a si. DC Area CND cu hmaizarh lei ah tuah than dawh a si tiin Salai Lairamthang nih a chim. 

May 2nd Ah Pakio le Mayeather An Ni Phomh Cang Lai: An chan chungah vawleicung thonghthiam minthang bik veve a si mi Philippine pa Pakio(36) le US pa Mayweather(37) cu a ralai mi May 2nd, MGM Grand, Las Vegas ah an ni thongh cang lai ti a si. An nih pahnih hi an ni thongh lai tiin kum nga chung rak ceih a si cang nain an ni phomh tak bal lo,tutan lawng hi an ni phomh lai. 

Pakio hi voi 64 ai thongh cang i voi 5 a sung, voi 57 a tei. Mayweather hi voi 45 ai thongh cang nain voikhat hmanh a sung bal rih lo, 'unbeaten boxer' tiin a lang mi a si. Tutan thonghnak ah a chuak hgna ding phaisa hi 250 million hrawng a si lai tiin ruah a si. BBC, ESPN boxing

Kokang Ral Ruangah Tuluk Ram ah A Zam mi 40,000 Leng An Phan: Kan hnu Feb 9 in ai thawk mi Kokang hriamtlai phu le kawl ralkap kar i kahnak ruangah Kokang mi 40,000 leng nih an umnak chuahtak in Tuluk ram ah dor nak an kawl ti a si. Tuluk ram ah a zam mi cu Tuluk lei nih a herhmi an bawmh hna nain kawlram lei kap ah a um mi ralzam bel cu an bawm kho hna lo caah har nak tampi an tong ti a si. BBC Burmese. 

Quote of The Day: 'Nan ka thangchiat deuh deuh lai, thluachuah ka hmu deuh deuh lai'.     By Salai Lairamthang