Thawngpang Bultan

EU ai-awhtu Minung Pali Chinram An Ra Lai: Chin ramkulh kongkau ceihmai ding in European Union ai-awhtu upa minung pali hna cu February 19 ah Hakha an phan lai tiah The Hakha Post nih a tial.

EU in a ra ding upa hna cu (1) Isabel Faria, Head of Co-operation; (2) Isabell Popel Baum, Political Advisor; (3) Manuel De Rivera Lamo De Espinosa, Programme Manager le (4)Aung Aung, Political Officerhna an si tiah theih a si.

“Chinram ah EU an rat hi atu a voikhatnak a si lai. Thawng an kan thanh ning in cun February ni 19 zan ah Remdaihnak Committee he biaruahnak kan ngei lai. Cuhnu in Chin ramkulh cozah he biaruahnak an ngei lai” tiah Remdaihnak Committee chungtuantu Rev. Tluang Ceu nih Hakha Post ah a chim. “Chin Miphun Ni zong tel an i tim ve” tiah a chim chap ti a si. 

Hlawhtling thlacamnak Vailam tung kong thawngpang: Ramkulh cozah nih pek a timhmi cu acre pathum lawng a si caah zapi nih hman khawhmi thlacamnak hmunhma a si khawh nakding ah, Rev. J. Biak Tin Sang nih HCMF (Hakha Christian Ministers Fellowship) kut ah a apmi acres 40 in sok ding le cozah nih Buddhist a pekmi Khuhsi bo kong ah ca tial dingin HCMF nih an timhtuah cuahmah lio a si tiah HCMF chungtel pakhat sin in thawng kan theih.The Hakha Post

Chinram Cozah Nih Union Day An Tuah Ve: Chin ramkulh cozah nih a voi (68)nk Ramkomh Ni (Union Day) Hakha Vom Tu Maung ceertual, February 12 zing 9:00 ah an tuah i Chin ramkulh Vuanci pawl, cozah riantuan le ralkap le khuami minung 400 hrawng an kai tiah The Hakha Post nih a tial.

Caan hman ning cu Chin ramkulh cozah Chief Minister Pu Hung Ngai upat peknak (a lepiohnak) le Rampi puanlaang (flag) upat peknak ralkap hruainak in tuah a si. Mah dih in Chief Minister Pu Hung Ngai nih President biacah rel le chimnak a zong a ngei ti a si.