Thawngpang Bultan (Feb 20)

Company 24 Leng Nih Chinram Leitang Chuak Mansung Kawl An Timh Cang:  Chinram chung leitang chuak lung man sung darsen le chromite pawl kawl dingah ramchung company 24 leng nih Chinram kulh cozah sin nawl halnak an sok cang tiah Chinram tit-taw le leitang chuak zohkhenhtu Vuanci U Kyaw Nyien nih 7Days Daily ah a chim. 

Mah company pawl hi Chinram chung leitang chuak kawl khawhnak(test) nawl lawng pek an si lai i biatak tein lak/cawh khawhnak nawl cu kawlram chung leitangchuak upadi thar a chuah hnu lawng ah pek a si lai. Hi company 24 chungah 16 nih Kanpelet pengah kawl ding in an hal ti a si. 

Nikum lei Tuluk ta a si mi North Mining Company nih Tidim peng um Rul Tlang ah leitang chuak nickel lak ding a rak timh ah khan Chinram cozah nih covo 2% lawng a ngei ti a si. Hi covo kong he pehtlaih in Chinram nih 20% tal a ngah ve awk a si tiin Salai Ceu Bik Thawng nih 7 Days Daily ah a chim. 

Malaysia CND Chin Miss Cu Lengdawh Merryna Iang Tin Par Nih A Ngah: Tukum 2015 Malaysia CND Chin Miss zuamnak cu tuni Feb 20 ah tuah a si i lengdawh Merryna Iang Tin Par nih pakhat nak a ngah i pahnihnak hi Falam nu nih a ngah ve ti a si. 

Malaysia CND cu CNA ralbawi Col. Solomon Thang Ding sawm a si i Kuki,Naga le Asho tiang telh in Chinmi vialte hmun khat te ah an hmang ti kho,minung 1,000 leng an chuak ti a si. 

Leng dawh Merryna Iang Tin Par hi kum 19 lawng a si rih. Ai dawh lawng si loin a pum rua hrim a tha, Chin nu ah cun a sang lei a si lai. A nu le a pa hi Zophei peng Lawngtlang khuami an si i a mah hi Hakha ah a chuak. 

Theihtlei: President U Win Maung(Karen) term a dih deng cang caah U Nu nih a zumh bikmi a cabinet pawl a auh hna i 'a ho dah kawlram President thar kan thim lai' tiin ruahnak a hal cio hna. U Nu nih Chin Minister Pu Zahre Lian ruahnak a hal ve i hiti hin a leh.

"Ne Win hi kawlram President a si awk a si"

"Ne Win should be the next President". 

"Kum hnih chung(1958-1960) cozah tha tein a hruai khawh hlei ah election tlamtling tein a tuah khawh, nawl ngeihnak power zong election teitu kut ah a ap than khawh caah hi laksawng hi pek phu a si".

"He was able to take care of the Government, hold elections, hand over power to civilian  authority. That was a good record of achievements and he should be rewarded". (Steven Hre Kio. Zahre Lian of Burma.P-182).