A bik in ramthumnak um Chinmi nih Chin National Day cu Feb 20 theng si loin a relrem deuh mi ni caan ah tuah a si theu. Hiti Feb 20 si loin a dang ni ah CND kan hman tawn hi micheu nih an doh ngai ve caah tukar facebook ah ceih ngai mi issue pakhat a hung si.
Hi kong he pehtlaih in Laimi catial thiam Pu Perhkalh nih 'Kumkhat, Norway Laimi nih nan nawl an kan cawnpi ve ciammam i zarhte ni a ni lo pi ah an kan tuahpi bal. Laica zuamnak an tuah i, ""Chin miphun ni cu.............. a si"" tiah campipuai an phitter hna cu kan fa le nih, ""Chin Miphun Ni Cu February ni 18 a si''' an ti daih ko' tiin amah ruahnak a phuan ve.
Laimi nih kan bochan ngai mi Salai Lairamthang zong nih US um Chinmi nih Feb 20 theng te ah CND tuah ding a har ning hi ti hin a tial ve. "Pakhat te lawng ka chim rih lai. Ka chim ahcun a tam tuk lai caah. Laimi cu kan rianttuannak company, kan rianttuannak hmun hma 100 ah 80% hrawng cu a khat dihmi kan si. Company pakhat ah Laimi lawngte minung 100 an ttuan tik ah minung 100 ning in CND ni ah rianttuan loin an um ahcun, mah company cu khar hau ding phun in an um. Cucaah kan thinlung nih cun a duh nain kan duhnak kha kan sining nih a zul kho tawn lo. Idea cu a ttha rilmal nain tuah taktak a fawi lo.." a ti ve.
Hakha lei in The Chinland Post editor June Nilian Sang nih hi ti hin a ruahnak a langhter ve"Atu ahcun Chinram zong ah sianginn kai liomi dah tilo mino tam u cu rian an ngah dihngawt. Zungkhar le dinhhal pek cu a um hlei lo. Sianghleirun kan kai lio ah CND cu (class test or tutorial) tlolh hmanh in kan rak tawlrel. Ngaihthiam a um lo. Naite ah thawng kan theih tthanmi cu “Matupi ah February 20 ah ngakchia campipuai an phi lai” ti a si rih. Cozah ziatthinh cu hngah awk ah ka ruat lo".
Tulio Thailand ah MA a kai lio mi Sang Hnin Lian zong nih Feb 20 ah CND kan tuah kho lo mi cu fak ngai in a duhlonak a langhter ve. A mah nih"Kawlram Cozah nih, Chin National Day hi, Feb. 20 ah nan tuah kho lo,Feb. 18 silole Feb. 22 ah nan tuah lai tiah, rak kan ti tuah hna sehlaw, a zeibang-zeibang in, atu i, tuan deuh tuahmi le tlaideuh tuah tawnmi pawl nih hin, Fawi ngai khin, Ramdang in, "Sandahpiah" a hau, "Signature Campaign" tuah a hau, tiah, Sayakyi khi nan rak tuan hoi lai cu mu! Nan kong ka ruah ah hin a celh in ka celh lo, Kawl cozah kong ka ruah lio i, ka thin a ka phawh bantukte in ka phawh ve! Duhnak taktak nan ngeih ahcun, A chuakmi zat kha chuak kho hna seh! Lungput a bia pi!" a ti ve.
Kawi!, Na vun khomhsuat tih, a tha tuk... Nain, sining ka zoh tik ah, "lethmioh" piak phun an si cang bang in a lang...! Cawpi hmai i, Tingtang tum he an i lo ko cang.... CND a ni lo i, tuah khi a ziak in an iziak! Kawl nih "Puai Pi Mi Te", Puai a dih i, mei a thi, puai a dih i, zeizong vialte a dih dih, timi bantuk, a chung muru zong ruat lem set lo i, a vaivuan men ding kan tam ko cang hih! Lohtlau si!
ReplyDeleteNational Day, Independence Day etc tbk hi miphun kip nih an sunhsak bikmi le a upat bikmi a si i, Pathian hmanh nih a sunhsak tukmi a si i, Egypt in Israel an luat ah khan philh lonak rak tuah lengmang u tiah nawl a pek hna.
ReplyDeleteCuucaah ram kip nih an National Day a siah an Independence Day a siah an umnak ram kip ah an hman hna. US a siah Australia a siah ramdang mi khi zoh hna u law an NI ah cun lian taktak le ropui taktak le authawng he conghlawmhnak an tuah.
Democracy ram ah a ummi an si hna bantukin zalong tein Cozah nih a onh dih hna; ho ram hmanh kha na tuah kho lo tiah a khammi an um lo. Democracy ram ah cun Cozah nih minung pakhat right kha a upat i, a ram sining le dirhmun zong a upat chih.
A caan a rem lo ruangah ND a siah Day a siah ID ni dang ah tuah timi ka thei bal lo. Laimi lawng hi a voikhat a tuahmi kan si. Laimi hi vawleicung a ropui cem cu kan si ko lai dah tiah ka ruah. Ka khuaruah a har ngai.
Ramdang ah cun kan dirhmun nih a ka chitpiak lo ti zong a um kho men. Asinain zapi tel khawhnak ding ah kan dirhmun nih a kan chitpiak lo ti a si ahcun zei tikah dah a chitpiak hlei hna lai? Cucaah Laimi nih Chin National Day cu amah Ni te ah tuah ding a si.
Asinain amah Ni theng ah cun kan tuah kho bak lai lo an ti ah cun amah Ni theng ah a tuah kho lomi ram paoh nih a hlanken tein amah Ni theng ah an tuah khawh lonak ruang kha Chinmi zapi theih in thawngthanhnak kan tuah seh law a hmaanmi a si.
Aruang cu cheukhat nih amah Ni theng ah tuah i, cheu khat nih duh paoh in anmah le remning cio in tuah cu a hmaan lomi a si i, a phung zong a si lo. Historic Day dirhtu le a rak chuah pitu hna upat lo zong a si i, Chinmi lungthin put aa dawh lonak a langhtertu zong a si.
Ka siaherh bia tawite ka vun langhter
Kaa lawm