Kawl Ralkap Nih Helicopter Raltuknak An Hmang Than Hoi: Kan hnu December thla in ai thawk mi Kokang ralkap le kawl ralkap kar i dohnak cu nizaan nikhat ni in a zual chin chin tiah Irrawaddy nih a tial. Nikhat ni an ni kapnak ah kawl ralkap pathum an thi i Kokang ralkap pa li hrawng hma an pu ti a si. Kawl ralkap nih nikum lei KIA a rak kap hna bantuk khan tutan zongah helicopter in a kap hna ti a si, helicopter nih a kap hna lio video zong TNLA facebook ah an tar.
Kokang hi an mah tein an ralkap Kokang Myanmar National Democratic Alliance Army (KMNDA) kuttang ah ai uk mi(self-administered) an si.2009 ah khan kawl ralkap he an ni kap than. 2009 ah khan kawl ralkap nih an hmunhma an rak lak i cucu ngah than dingah an ni zuam cuah mah than. A tu an ni kap nak zong mah hmunhma lak than an duh ruangah a si. Ta-ang National Liberation Army(TNLA) le Arakan Army zong nih tutan ah an bawmh ve hna ti a si.
Kokang hi milu 150,000 hrawng an si i 90% hi tuluk an si, 100,000 hrawng lawng nih kawlram citizenship an lak,a tangmi cu Chinese citizenship an lak ti a si. China ramri ah a um caah Chinese thil deuh an hmang. KMNDA hi UNFC member tling a si hlei ah NCCT member zong a si nain cozah lei nih a pawmpi lomi member a si.
Measles Zawtnak US Ah A Karh Chin Leng Mang: Tih a nung ngai mi zawtnak measles timi cu US ram state pathum le Washington D.C hna ah a karh chin i a thar in minung 19 nih an ngei chap tiah Washington Post nih a tial. Tukum chung US ah hi zawtnak a ngeimi minung 121 leng an si cang ti a si.
Hi zawtnak hi Laiholh in cun hmaihu zawtnak kan timi he ai lo ngai. Thli(airborne disease) in chawnh khawh mi a si. Tha tein thlop ko ah cun thihnak tiang cu a chuah pi lo nain chungtlik, mit hmuh khawh lo nak, thluak le cuap phinnak le takpum cung vialte a sen bo tete chuak dihnak tibantuk a chuahpi kho ti a si.
US ah cun 2000 kum ah khan hi zawtnak kan hloh cikcek cang an rak ti nain a tu a chuak than tikah cozah lei zong nih biatak tein an buaipi ti a si.
No comments:
Post a Comment