Kokang Ram Ah Ralkap Nih Uknak A Lak Cang

Kokang hriamtlai phu le kawl ralkap kar i kahnak cu kan hnu Feb 9 in ai thawk i tuni tiang a zual chin leng mang hlei ah Kokang mipi zong har nak an tong tuk cang caah President Thein Sein nih Kokang ram uknak nawl le a herhmi biachahnak nawl cu Gen. Min Aung Hlaing kut ah a ap cang tiah MRTV nih a chim. 

Kokang ram uk ding ah hin Gen. Min Aung Hlaing nih a mah duhmi ralkap pakhat khat zong a herh ah cun a fial khawh. Kokang ram ah state of emergency zong ni 90 caah thanh chih a si. Hi ralkap uknak(martial law) hi zeitik tiangdah an hman lai ti cu thanh chih a si lo. 

Kokang hriamtlai le kawl ralkap kar i kahnak ah Kokang lei minung 18 an thi i kawl ralkap lei minung 47 an thi cang. Hi ral ruangah a Kokang ram a zam tak mi minung a thawng tampi an si cang.