Australia Chin Khrifa Bu Nih Malaysia Chinmi Harnak Tong An Bawmh Hna: Australia ram um Chin Khrifabu 17 fonh in dirhmi Chin Christian Council In Australia (CCCA) nih Malaysia ram Cameron Highland ah harnak a tong mi Chinmi inn chungkhar 198 chungah 80 leng cu nizaan Feb 26 ah bawmhnak phun phun in an pek hna i a tangmi chungkhar zong Feb 27 ah an pek rih hna lai tiah CCCA ai-awhtu Ram Tinthei sin in thawng kan theih.
An phawtmi bawmhnak hna cu facang tun 200, pe cuai 200, arti pum 6000, chiti bag 200, khohsuai bawm 800, cite cuai 200, ngachioh bawm 200, arsa ( chicken can) 200, ngasa ( fish can) 200 tbk an si.
Hika Cameron Highland ah harnak a tong mi Chinmi hna hi UN card a ngei lomi an si caah palik tlaih lai an tih i hika hmun ah dawrnak an kawl cio ti a si. Rian tuan awk a um lo hlei ah a leng zong an chuak ngam lo ti a si caah ei ding ti rawl hmanh an ngei lo, ramtang ai thup mi an si hlei ah Palik le Oparasi an tam tuk caah bawmhnak pe tu NGO a si mi CRC le ACR zong an lut ngam lo ti a si. Feb 26 ah an bawmhmi hna tam deuh hi Matupi lei Chinmi deuh an si ti a si.
Hiti CCCA nih an bawmh hna nak hmanthlak tete cu Ram Tinthei nih a facebook ah a rak tar leng mang i mino tampi zong nih an cawnglawmh ngai cio.
Kokang Hriamtlai A Phomh Hnu In Kawl Ralkap Kawlmi Lakah A Hung Lar Ngai Than: Ne Win chan in kawlmi lungthin ah huatnak thlaici a rak tuh i huat ngai a si mi kawl ralkap cu kan hnu Feb 9 ah Kokang hriamtlai phu he an ni kah hnu in kawlmi tam ngai nih facebook le media tampi ah an hung cawnglawmh ngai cang hna tiah Irrawaddy nih a tial.
Kan hnu Feb 9 in 12 kar ah ralbawi telh in kawl ralkap 47 reng lo an thih ah khan kawlmi an lung a rak fak ngai cio. Kawl ralkap upat peknak caah tiin an profile picture zong ralkap hmanthlak tete an rak tar len. Ralkap nih thawng an rak thlak ve mi capo saih thiam Zagana zong nih 'Hihi cu ralkap nih a tuah awk a si ko-a ho poah nih an ti cio. Kei zong ka ti ve ko' tiah Reuters sinah a chim.
US Blogger pakhat Bangladesh Ah An Thah: US ram ah khua a sa mi Bangladesh pa Avijit Roy cu a blog le a cauk pawl ah zumhnak kong he pehtlai in a mah a ruahning a tial mi pawl cu Muslim activist tampi nih an duh lo ngai caah nizaan Feb 26 ah Bangladesh khuapi Dhaka ah a ho set dah a si ti theih lo mi mibu nih an thah tiah BBC nih a tial.
A nih hi Mukto-mona or Free Mind timi blog a tuahtu a si i hi a blog ah biaknak vialte i tlukruan nak(secularism), science le a dang dang a mah hmuh ning a tial leng mang mi a si. Blog chung a catial mi lawng si loin cauk zong 8 leng a chuah cang mi a si.
Australia Um Muslim Nu IS Ralhrang A Bawmtu An Tam Chin: Australia ram um Muslim nu 40 leng nih IS ralhrang pawl an bawmh hna, cheukhat cu IS ralhrang pawl he ral an do ve, cheukhat cu bawmhnak an pek hna tiah Australia Foreign Minister Julie Bishop nih a chim tiah BBC nih a tial.
Hiti IS ralhrang a bawmhtu nu cheukhat cu an va le ton ding ah Syria le Iraq ah a kal mi zong an um i cheukhat cu IS ralhrang he i um ding in a kal mi zong an um ti a si. Hiti IS ralhrang sin ah ai va fonh mi hna an rak kir ding hi Australia humhimnak tuanvo ngei tu nih an tih ngai mi a si.
*** Atang i caw-ngia hmanthlak na click ah kei phaisa ka ngah ve, voikhat tal ka click piak ve hram!
No comments:
Post a Comment