Thawngpang Bultan (Feb 17)

US ah Hindu Biakinn Zohchia In An Tuah Caah India Thin A Phang: Seattle Metropolitan Area, state of Washington ah a um mi Hindu biakinn pakhat vampang ah cahang sen in 'chuak cang uh' 'get out' timi an tial caah US um Hindu pawl an thin a phan ter hna hlei ah India um Hindu pawl zong an lung a rawk ngai cio tiah The Times Of India nih a chim. 

Hi huatnak ca tha lo a tial tu hi a ho set a si ti theih a si rih lo,an hlathlai cuahmah lio a si. Bothell khuapi sianginn pakhat zongah 'Muslim pawl chuak cang uh' 'Muslims get out' timi ca an tar ve. Hi bantuk huatnak ca tar ruangah US um biaknak pakhat le pakhat kar buaibainak hna a chuak kho ti a si.  

Saikel Firtu Hakha Ah An Tlaih: Hakha palek nih Kalaymyo in Cycle a rak fir i Hakha ah a zuartu Peter Biak Thang (kum 19) cu Cycle a zuar cuahmah lio January 13 ah an tlaih tiah The Chinlad Post nih a tial. "A rak firmi hi 125 Kenbo a si. Sing sarih man ah si i Hakha ah sing nga in a rak zuar. A zuar lio ah kan tlaih hi a si," tiah Hakha palek bawi Duh-te—ye-hmu Sang Lian nih The Chinland Post ah a chim.

Cycle a ngeitu cu Rezua peng ah a ummi Pu Hla Tun Cycle a si i thil a fir ruang ah ျပစ္မႈဆိုင္ရာ ဥပေဒပုဒ္မ ၇၉ / ၄၅ in palek nih a hmuh an phun tiah kan theih.

Hakha Phone Zohkhenhtu Chuncaw Tal Dangh An Ho: Hakha khuachungah landline phone 1,600 lawng a um,hihi minung pathum nih an zohkhenh i minung kan tlawm deuh an ti caah Hakha phone an remh ah har nak tampi a um an ti. Phone zohkhenh tu nih phone an remh tikah an datsi man le chuncaw einak tal pek lo ah cun an lung a dong kho tiah riantuan tu Pa Hmung nih The Chinland Post ah a chim. 

Hakha phone hi a rawh caan tam ngai i remh piak tikah a lak in remh piak a um bal theng lo, upadi nih cun free in remh piak ding a ti nain. A tu mobile phone a van lar hnu ah cun micheukhat nih remh man lehlam a fak tiin an phone remh zong an huam ti lo ti a si. 

Minung pakhat nih phone 533 lawng zoh khenh an i harh hi cu ruah awk ngai cu a si ve. Phone a rawh caan a tam tuk lawmmam caah maw a si hnga or riantuan tu santlaih lo reng reng dah a si hnga!