UNFC nih Kokang Hriamtlai Phu A Hung Dirpi Ve Cang: Cozah nih a cohlang bak lomi, ralhrang(tawng-cian-tu) bak ah a ruahmi Phone Kya Shin hruaimi Kokang hriamtlai phu cu kawl cozah nih a dang hriamtlai phu bantuk in miphun ai-awh hriamtlai phu pakhat ah a cohlan nak hnga le a kah ti lo nak hnga ding caah tlangcung hriamtlai phu komh United Nationalities Federal Council(UNFC) nih Feb 21 ah cathluan an chuah.
Phone Kya Shin hruaimi Kokang hriamtlai phu (MNDAA) hi UNFC member tling a si hlei ah tulio ram pumpi kahdaihnak ser ai zuam cuahmah mi NCCT zongah a cawlcangh ngai mi a si. Kokang hriamtlai phu MNDAA hi an nuhrin covo ngahnak ding caah ral a tu mi an si tiah UNFC nih cun a thanh.
Kokang Ram Ah 'Red Cross' An Kah Rih Hoi: Kan hnu Feb 17 ah khan Kokang ram harnak a tong mi bawmh dingah a kal mi 'Red Cross' cu lampi an kal cuahmah lio ah an kah hna i minung pahnih hma an pu, nizaan Feb 21 zongah an kah rih hna caah journalist telh in minung 5 hma an pu rih ti a si.
Hiti a kahtu hna hi kawl ralkap or Kokang ralkap dah an si timi a fiang lo nain 'Red Cross' riantuan tu nih cun Kokang ralkap an si an ti. Hiti 'Red Cross' an kahnak ah a thi mi an um hrawl lo ti a si.Irrawaddy
CNF Upa Nih Laiza Kahnak Ah Athimi J. Biak Tin Lian Upatnak An Pek: Pu Lian Uk telh CNF upa 7 nih nikum November thla ah kawl ralkap kahnak in a thi mi John Biak Tin Lian lungdonh ah an va kal i upatpek nak zong an ngei kho tiah The Chinland Post nih a tial.
Hiti upatpeknak ah CNA ralkap pa 5 hruainak in 'salute' peknak zong an ngei kho ti a si. Tutan upat peknak ah Pu Lian Uk nih biatawi chimnak a ngei i lungzur in a mitthli zong a tla ti a si.
US nih Russia Cung Sipuazi Phihnak Rengh Chin Dawh A Si: Ukraine cozah ralkap le Russia duhtu hriamtlai pawl kar i kahnak cu a dai hlei lo,hihi Russia nih hriamtlai phu a forh chih hna caah a si tiin US nih Russia a mawtchiat i sipuazi phihnak(sanctions) rengh rih ding in Obama he kan ceih lai tiah John Kerry nih London a rat lio ah a chim tiah BBC nih a tial.
Ukraine ram nichuah lei hriamtlai phu pawl hi Russia a duhmi an si caah Russia nih hriamnam le ralkap thazang tiang in a bawmh hna ti a si. Cozah ralkap nih an tei kho bak hna lo.
Zomi National Day An Hmang Cio Ve: Kan hnu Feb 20 ah khan ka kip um Chinmi tampi nih 'Chin National Day' tiin kan miphun ni kan hman cio lio ah kan unau a si ve mi Zomi ai timi Chinmi zong nih 'Zomi National Day' tiin an hmang cio ve.
Hiti Zomi National Day hmannak kong he pehtlai in Sang Cung Lian nih 'Mah ruangah Laimi hi Federal kan ngah zongah kan rau lai lo Senthang peng, Miepeng, Bual Tak, Caw Buk ti bantuk in independent kan chauk te dih ko lai' tiin a lungtlin lonak a langhter ve.
Theihtlei: Aung San hruaimi constitution tialtu committee nih 1947 Constitution cu 'Federal' hram bunh in an rak tial. Nain, Aung San an thah caah nawlngeihnak U Nu kut cung a phan. U Nu nih ai thawh riangmang i Aung San tialcia mi phunghrampi cu U Chan Htoon a remh ter than dih, 'Federal' he ai kalh mi 'unitary' ah a remh viar. Hikong he pehtlai in 1947 kawlram Constitution remhtu Chan Htoon nih hiti hin a chim.
'1947 Constitution hi a theory in cun 'Federal' a si nain a taktak ah cun 'unitary' a si'.
'Our constitution in theory federal, is in practice unitary'. ( Tinker, Hugh. The Union of Burma. London: Oxford University Press, 1967. P. 30).
No comments:
Post a Comment