Ebola Zawtnak Hi Kan Tih Awk A Si Ti Maw: Nitlaklei Africa ram a si mi Guinea, Liberia le Sierra Leone hna ah hi Ebola zawnak that lo hi nikum March thla in a karh a zual i a ho poah thin phang in a rak kan chiah. Nikum October thla ah khan cun zarkhat ah minung 1,000 leng mang hi zawtnak nih a tlunh hna. Nain,tuhi cu zarkhat ah Ebola zawtnak a ngei thar mi 150 lawng an karh tiah World Health Organization(WHO) nih a thanh.
Feb 8 tiangah hi zawtnak a ngei mi dihlak 22,859 an si i hi chungah minung 9,177 an thi. Nigeria le Senegal ram hna ah cun hi zawtnak an khamh khawh cang ti a si. Sierra Leone bel ah hin cun a karh a rang ngai rih ti a si. Hi zawtnak in US minung pahnih zong an thi ve.
Hi Ebola khamhnak ding caah US nih $5.4 billion a bawmh hna hlei ah US ralkap 28,000 zong hi zawtnak ruangah a tuar mi bawmh ding ah an thlah hna. Ebola in a zawmi an tlawm deuh cang caah hi US ralkap 1,300 zong an kir ter than hna lai tiah White Hose nih thawng a thanh.Atu Ebola a karh ning zoh tikah thinphang awk a um tuk ti loin a lang cang.
Australia Sydney ah IS Terrorist An Tlaih Hna: IS alan(flag) ai put i Sydney khua ah mi that ai timh mi ralhrang pahnih cu Australia palik nih nizaan Tuesday ah khan an tlaih manh hna. Hiti an tlaih lio hna ah hin IS alan, mithatnak vai nam le mi thatnak ding a langhter tu video hna an lak chih tiah BBC nih a tial.
Australia hi kan hnu Octbober thla in IS ralhrang pawl a kap ve mi a si. Australia minung 60 hrawng hi IS ralhrang sinah an lut ve i 100 hrawng nih Australia in an bawmh tiin Australia cozah nih a zumh. Kan hnu December thla zongah terrorist ralhrang minung pakhat nih Coffee dawr ah mibu pi a tlaih hna i minung pahnih nunnak zong a rak liam cang.
No comments:
Post a Comment