Thawngpang Bultan (Feb 14)

LIVE in Lai Paih Zoh Duh Ah $40 Bak Pek A Hau: North America Paih Committee hruainak in Indianapolis ah an tuah mi Lai paih cu LIVE in an thlah i zoh a duhmi poah nih $40 pek hnu lawngah zoh khawh a si. Hi paihnak hi zing 11 am in zaan 8 pm tiang tuah a si i bualco tu hi $4,000 laksawng pek a si lai ti a si. 

Hiti free in zoh khawh a si lo hlei ah nikhat ca $40 pek a hau caah mi cheukhat nih an duhlonak Salai Lairamthang facebook ah an phuan cio. Salai Biak Tum Lian nih '$40 cu nan ti tuk deuh ko rua. Ramdang zong in zoh kan duh ve nain $40 ka hmuh i ka kau ngam ti lo' tiin a lungtlin lo nak Salai Lairamthang facebook ah a phuan ve. Facebook min ah Khamtung Motor tiin ai pe mi pakhat nih 'Paih zohnak ah $40 pek ding cu a fawi bak lo.Kan ram ah misifak bawmh a tha deuh lai' tiin a duhlonak a langter ve.

Avoi 67nak Chin National Day Cup An Lim: Malaysia um Chinmi hna nih kum fatin tuah tawn mi Chin National Day Cup tuni Feb 14 ah an lim i bawlung chuih ah Hakha nih pakhatnak an lak i Falam nih pahnihnak an lak. Nu volleyball ah Senthang nih pakhatnak an lak i Zophei nih pahnihnak an lak ve. Cun,pa volleyball ah Falam A le B nih pakhatnak le pahnihnak an lak tiin thawng theih a si. 

Tutan CND Cup chairman hi Saya Mung Khat(Tidim),Secretary hi Saya Steven Zahu (Lautu) an si i ram le miphun dawtnak tak tak in a cawlcang mi an si tiah Pawlung nih a facebook ah a tial. " Chin miphun lungrual nak(Unity) a biapi bik ah a chiahmi an si I, Pathian bochan bu tein Chin miphun hna caah a cawlcanghmi hruaitu tha an si' tiin Pawlung nih a chim chap. Nain, voidang tawn bang,inn an tin lai bel ah hnahnawhnak tete a um pah ti a si.