Parliament Pekmi Sa Rohingya Nih An Ei Hlan Ah Thein Sein Nih A Chuh Than Hna: Kan hnu Feb 2 ah khan kawlram parliament nih white card a tlaih mi(Rohingya) zong phunghram remh (referendum) tikah vote an thlak kho ding in phung an rak fehter. Nain, Rakhine mipi le kawl phungki pawl hruainak in duhlo nak an langhter caah President Thein Sein nih nih 'white card' a tlaihmi poah referendum tikah vote pek khawh a si than lai lo tiin Feb 11 ah catlhuan a chuah than.
A ngai ngai ti ah cun,nikum ah Parliament nih white card a tlaimi vote thlak nak nawl a pek lomi upadi cu President sin an kuat nain President nih white card a tlaimi zong vote thlak khawh ding in a remh ter than mi a si. Kawlram chung Rohingya hi milu tinghra leng an um nain kawl cozah nih citizenship a pe hna lo, White card hi lawlawse 2010 election ah vote thlak khawhnak ding ah ralkap cozah nih an rak tuah piak hna. 2012 hnu in Rakhine le Rohingya kar buainak a um leng mang i minung 200 leng an thi cang. BBC,Irrawaddy
US ah Kum 1,000 Chung A Car Bik Nikhua Caan A Phan Lai:A ralaimi kum 35 hnu in kum thawngkhat chung ah a car bik nikhua caan cu US thlanglei Arizona, Carlifornia, New Mexico,Texas le central Great Plains tibantuk hna ah a tlung lai tiin nikhua caan kherhlai tu NASA Goddard Institute for Space Study nih an chim. Hihi 12th le 13th century lio US a rak car mi nak in a zual deuh rih lai ti a si.
Hiti nikhua a car tikah cun ruasur a tlawm lai i vawlei a lin lai caah ti harnak zong a chuah pi lai ti a si. Ruasur a tlawm lai caah thingthei an hnah zong cin a har lai caah lo tuahtu har nak tampi an tong te lai. Nikum 2014 chung hiti nikhua car ruangah California ah $2 billion leng sungh a si. Scientific American, The Guardian.
Australia ah Rian Ngeilo An Karh Chin Leng Mang: Tuni Feb 12 ah Australia ram chung rian ngeilo zat(unemployment rate) cu 6.4% tiang a kai i hihi 2002 hnu in a sang bik a si. January thla chung hrim ah rian ngeilo minung 12,200 leng an phan tiah Australia Bureau of Statistic nih a thanh.
Hiti rian ngeilo an karh hi rampi sipuazi tha a dernak pakhat a si. Australia dollar zong a tha a van der deuh ve. A tu lio US unemployment rate hi 5.7 a si ve. Unemployment rate a niam deuh poah ah rian ngei lo an tlawm i ram a thanco a rang deuh ve. Sydney Morning Herald, The Guardian
No comments:
Post a Comment