US Muslim 3 Thihnak Nih Ka Kip Um Muslim Lung A Rawh Ter: US ram North Carolina um muslim pathum hna cu kan hnu Feb 10 ah khan meithal in an kah hna i an thi. Hi hna a thattu hi an innpa a si lai ti asi i thawng an thlak ve cang. Hi ruangah vawlei ka kip um muslim pawl nih fak piin action lak dingah US an rak au hnawh cio.
A thattu a nupi nih cun mawtaw chiahnak(parking) hmunhma ruangah i rem lonak a um a ti nain a thimi chungkhar le muslim tampi nih cun muslim pawl an kan huat 'hate crime' ruangah a si an ti ve. Hi muslim pathum thihnak he pehtlaih in Turkey President Tayyip Erdogan nih Obama, Joe Biden le John Kerry zong 'ziah,nan dai ko' tiin a mawtchiat len hna.
Athi mi ruak vuinak cu nizaan nilini ah tuah a si i minung 5,500 leng nih an tel pi kho hna ti a si. VOA,The Guardian
Kokang He I Kahnak Ah Kawl Ralkap A Tomtom In An Thi: Feb 9 in 12 tiang Kokang hriamtlai phu le kawl ralkap kar i kahnak ruangah kawl ralkap minung 47 an thi i 73 leng hma an pu tiah kawl cozah tadinca Global New Light of Myanmar nih tuni ningani ah a phuan.
Kokang lei hi minung 3 an thi i minung 8 hma an pu ve tiah Kokang lei nih an chim ve. Tutan i kahnak ah hin kawl ralkap lei nih Russia chuak raltuknak vanlawng Mi-35 le Mi-29 hna zong an hmang chih ti a si. Hiti an ni kah ruangah Lauikkai khua mi vialte cu China ram Yunnan lei i dawrnak an kawl cio ti a si.
Kawlram Ah A Tlawmbik Nikhat Nihlawh $5 Tal Pek Ding An Chuahpi: Minung pakhat nih nikhat ah nazi 8 chung a tuan mi a tlawm bik nihlawh cu Kyat 5,000 tal a si awk a si tiah kawlram chung a tlawmbik nihlawh khiah khawh ding caah cozah nih a fial mi hlathlai tu committee nih an chim.
Kawlram chung rian tuan tu cheukhat cu Kyat 3,000($3) lawng a ngah mi zong an um i um kal man a fah tuk tikah mi zaran caah cun inn man pek hmanh a fawi lomi dirhmun ah a um. Nikhat Ks 5,000 tal an ngah ah cun thlakhat ah Ks 150,000 tal an ngah lai i ai zia deuh lai ti a si. Kawlram ah nikhat an nihlawh hi US ah minute 30 chung an ngah mi tluk hmanh a si lo. Myanmar Times
No comments:
Post a Comment