Thawngpang Bultan (Feb 25)

Keystone Pipeline Kongah Obama Veto A Hman Cang: Canada ram in oil dawp khawh ding caah pipeline ser an timh mi Keystone XL bill cu Republican hruaimi Congress nih an fehter hnu in nizaan Feb 24 ah khan Obama sin an kuat i 'veto power' hmang in a hnon piak diam hna tiah BBC nih a tial.

Hi pipeline bill hi Democrats tampi le pawngkam zohkhenhtu pawl nih an doh ngai mi a si, aruang cu mah pipeline thawng in thli a hnawmter tu Carbon Dioxide a chuak lai caah 'global warming' timi vawleicung nikhua lumnak hna a chuah pi kho. Republican lei le Democrats cheukhat nih cun hi pipeline nih US mipi a hman ding oil fawi tein a dawp kho lai hlei ah rian zong 42,000 leng a ser lai an ti ve. Tutan Obama 'veto' hi a voithumnak a hman a si,a tangrih mi a term zongah hmang rih dawh a si. 

Israel Prime Minister Nih US Democrats Ton Ding Sawmnak A Hnon: Republican hruaitu sawmnak in Israel Prime Minister Natanyahu cu a ralai mi March 3 ah US Congress biachim ding a si, cuti US a rat tikah Israel tanhpi tu Democrats cheukhat zong nih ton biaruah ding an sawm nain a hnon piak hna tiah The Guardian nih a tial. 

Natanyahu a rat tikah Obama,Joe Biden le Democrats tampi nih kan tong lai lo an ti cang mi a si. Aruang cu Iran nuclear chiahter ding chonhbiaknak kongah Obama le Natanyahu an ruahnak ai kalh ngai caah a si. Obama nih a nemnak in Iran nuclear chiahter a duh, Natanyahu le Republican nih a cian-nii in chiahter an duh ve. 

Paris Khua Cung 'Drone' Zuangmi Nih Mipi Thin A Phan Ter: Zahan zaan le tihni zaan ah khan France ram khualipi Paris cungah vanlawng hmete 'drone' a zuangmi an hmuh lengmang,hi vanlawng hme tete hi a ho nih dah a thlah timi zong an thei kho rih lo caah mipi lawng si loin palik le humhmimnak tuanvo ngei tu zong khuaruah har in an um hna tiah BBC nih a tial. 

Paris khua cung 6,000m nak niam deuh in zeihmanh zuanter khawh a si lo nain hi mawnghtu ngei lo vanlawng hme 5 leng cu Paris khua cung ah an zuang leng mang ko ti a si. Kan hnu kum October thla zongah khan hibantuk 'drone' hi France nuclear hriamnam chiahnak hmunhma cung zongah hmuh a si rih.

Tuhi France ram palik pawl nih 'mah drone hi a ho nih dah a thlah' timi an hlat cuahmah lio a si. 

2008 Nargis Cyclone Tluk Afak Mi Thlichia Nih Australia A Den Nain: Kan hnu Feb 20 ah khan nazi pakhat 200km (200km/h)a kal kho mi thlichia nih Australia ram Queensland hrawng a den i inn 1,000 hrawng a hrawh nain a thi mi cu an um hrawl lo tiah BBC nih a tial. 

2008 lio kawlram Nargis mung-taing kha nazi pakhat ah 200km a rak kal ve ko, kha lio ah khan minung 200,000 leng an rak thi i thil $10 billion man renglo a rak hrawh. Ram tha ah cun thilchia le tilet zong hi an hrial kho ko rua!

Quote of The Day:" Chief Guest " anti maw ? Laimi itonnak puai ttukttak ah Vunraang tibantuk , minak , mihmul tbt nih a hmaitlang ah a vun kan tthutpi ahcun kan puai a sungsa deuh mi le a hlawhtling deuh mi a lo. Mah tluk I miphundang an uarh ahcun tthitvaat duhnak lungthin mino sin ah isem lo awk ttha hlah. By Interview Bawi, Dallas,USA. (Tutan CND khuallian sawmnak kongah a chim mi a si).