Feb 16, Insein ah tuahmi 'Zeiruangah dah Union Day ah Min Kan Thut' timi tlangtar in Karen mipi le KNU kar i tonnak ah KNU nih 'a tu Feb thla dih lei ah cozah he kan mah tein ralkap hmunhma chiahnak kong kan ceih cang lai' an ti tiah Irrawaddy Burmese nih tuni ah a tial.
Hiti an mah tein cozah chonh an timhnak a ruangbik cu Nationwide Cease-fire Coordination Team(NCCT) nih ramdaihnak a kalpi ning kan lung a tlin ti lo caah kan mah tein chonh kan timh nak a si tiah KNU lei nih an chim. Hiti i ralkap umnak hmunhma ceih dingah cozah lei he hnatlaknak zong kan ngah cang an ti.
Mah kong he pehtlaih in KNU hotu Gen. Mutu Say Poe nih 'Hi bantuk ramkhel kong buainak hi cu meithal in phisin khawh ding phun a si lo. Cabuai cung i chonhnak tu in phisin ding a si, cucaah KNU zong nih meithal in si ti loin cabuai cung tu ah ral doh kan timh nak a si' tiah a chim.
Gen. Mutu nih NCCT cung a lungtlin lo nak le KIA hotu zong a si i UNFC hotu zong a si chih mi Gen. N'Banla cung a lungtlin zong a chim chih. Kan hnu lei Gen. N'Banla nih a dang hriam tlai phu nawl hal loin kawl ram federal ser ning cang kong UNFC ai-awh in president sin ah a rak kuat mi nih ram pumpi kahdaih minthut nak(NCA) zong a nuar ter tiin Gen. Mutu nih a chim.
Ram daihnak ser khawh dingah KNU nih O hriamtlai pawl UWSA, Mongla hriamtlai, Shan hriam tlai RCSS/SSA le Karen hriam tlai KNPP te pawl fonh in kan kal ti lai tiah KNU lei nih an chim. KNU hi nikum ah khan UNFC zong in a chuak cang mi an si.
No comments:
Post a Comment