Thawngpang Bultan (Feb 17)

US le Turkey Nih Syria Hriamtlai Phu Training Pek Dawh An Si: President Assad hruaimi cozah thlak dingah ral a tho mi Free Syria Army 5,000 leng cu special training pek ding ah US le Turkey nih ceihmainak an ngei i tlawmpal ah hnatlaknak min zong an thu cang lai tiah BBC nih a tial. 

US nih training pe tu ah special forces telh in ralkap thazang 400 leng kuat ai timh i training cawnnak ding hmunhma cu Saudi Arabia,Qatar le Turkey nih an onh hna ti a si. US nih cun hi Syria hriamtlai phu hi IS ralhrang pawl phomh dingah training pek a duh nain Turkey nih cun Syria President al-Assad cozah thlak ter a duh ve. 

Hakha CND Tuahnak Hmun Ah CCTV An Bunh Ve: Tutan Hakha ah tuah dingmi avoi 67nak CND tuahnak hmunhma ah CCTV zong humhimnak lei tuanvo ngeitu CYO nih an bunh dih cang tiah The Chinland Post nih a tial. 

Hakha CND tuahnak ding Vomthu Maung celhhmun cu a chung he a leng he CCTV an bunh dih ti a si. Tutan Hakha CND chung humhimnak caah tuanvo a la tu ding cu CYO an si i CYO nih a tlangtlak kho lo mi le a zohkhenh kho lomi poah cu palek sin ah ap a si lai ti a si.

Hakha Khuachung Lam Thap Khat In An Phah Rih Lai: A tu an kauh cuahmah mi le lung zong an phah cuahmah mi Hakha khuachung lam cu a tu lung an phahmi an dih in a dang thap khat in phah chap rih an timh i fur tlak hlan ah lim ding in timh tuah a si tiah The Chinland Post nih a tial.

Tutan Hakha khuachung lam an kauh mi hi chaklei Vomthu Maung celhhmun in khuathar lei Thantlang lam tiang kauh a si,tuhi Ka-ta-ya an phah cuahmah lio a si. Minung ke kal nak le ti luannak hor hna cu tuah a si rih lo ti a si. 

Delhi CND Tuahnak LIVE in An Thlah Lai: Avoi 67nak Chin National Day cu a ralaimi Feb 20, New Delhi ah Chin Students' Union hruainak tuah an timh i ka kip um Chinmi vialte nih zoh khawh ve dingah LIVE zong in thlah chih an timh tiah The Chinland Post nih a tial.

Tutan CND tuahnak ah Delhi cozah ngunkeng(finance minister) a rak tuan bal mi Mukhi nih khuallian ah a tel pi hna lai ti a si. 

Mr. Putin Nih Ukraine Cozah Debaltseve Khua Chuahtak Ding A Hal: Ukraine cozah le Russia he i fonh a duhtu Ukraine nichuah lei hriamtlai pawl karlak ah kahdaihnak min an thut cang nain Debaltseve khua ah cun i kahnak a zual deuh caah Russia President Putin nih mah khua hi kal tak ding ah Ukraine cozah a forhfial hna. 

Debaltseve khua hi hriamtlai phu kuttang um mi Donetsk le Luhansk kar tlanglawng lam a kal nak a si caah kap hnih caah a biapi ngai mi a si. Hi ral ruangah minung 5,400 leng an thi cang ti a si. BBC