Kan hnu November thla election hnu in US Congress cu Republican nih a van control cang caah Obama cu a duhning in ai cawl kho ti lo. Obama nih US ram humhimnak lei tuanvo ngeitu a si mi Department of Homeland Security(DHS) caah $40 billion budget a chuahpi,hi budget hi phung ning loin US ramchung a um mi 4 million leng an ram kuat than lo ding le phung ning tein rian tuan ter khawhnak ca zongah hman a si lai caah Republican nih an fehter duh lo.
Republican nih cun hi phung ning loin US ram chung um mi 4 million leng hi an ram cio ah kuat (deport) than ding an duh. An mah duhning in DHS budget an suai than i House of Representative(kawlram Pyituh hluttaw bantuk) ah cun an fehter khawh nain Senate(Amyota hluttaw) ah cun an fehter kho ti lo, Obama phu Democrats nih an hnon than leng mang ve. US ah cun phung pakhat khat an ser tikah Senate MP 100 chungah 60 tal nih 'yes' an ti lo ah cun fehter khawh a si lo. Tutan Republican nih an chuahpi mi phung zong cu MP 47 nih 'yes',MP 46 nih 'No' an ti i Vote 13 ai duh rih caah an fehter khawh lo nak a si.
Hi DHS budget hi tuzarh ningani Feb 27 tiangah an fehter kho lo ah cun DHS riantuan tu vialte lakhah ngah loin an um te lai. Hi ruangah DHS riantuan tu 200,000 leng hi harnak an tong te lai caah US sipuazi(economy) zong a nuar ter kho ti a si. BBC,USA Today, Yahoo News.
No comments:
Post a Comment